Tennis thiam bik Carlos Alcaraz

Australian Open 2026 mipa final chu February 1, Pathianni khan khelh a ni a. Inkhel hmuhnawm takah Carlos Alcaraz chuan Grand Slam-a champion ngun ber Novak Djokovic a hneh a, ropui takin a champion. Australian Open final-ah Tennis player ropui bera ngaih Novak Djokovic meuh a hneh vangin Carlos Alcaraz hi Grand Slam pali-ah a champion kim ta chiah a. Career Grand Slam puitlin thei naupang ber record thar a siam nghal. Grand Slam pasarih la thei Alcaraz hi Tennis ngainatute ngaihven rawn hlawh a ni a. Alcaraz chanhin kan rawn chhawpchhuak e.
2023-ah ‘Tennis lal thar’ ti hial an sawi hluai Alcaraz hi May ni 5, 2003 khan El Palmar, Murcia, Spain-a a piang a. Carlos Alcaraz González leh Virginia Garfia Escandón te fa niin a hming pum chu Carlos Alcaraz Garfia a ni a, unau pathum a nei. A pa hi Real Sociedad Club de Campo de Murcia tennis academy-a director a nih vangin Tennis a zir hma hle. Kum 2018 atang khan Juan Carlos Ferrero’s Equelite JC Ferrero Sport Academy tan a khel tan a, hma pawh a sawn chak hle. He hmun atang hian mumal leh awmze nei zawkin Tennis zin kawng a zawh chho ta a ni.
Kum 16 mi lek a nih lai kum 2020 atangin Professional huang a luh chilh tan a, inelna a hmachhawn hmasak ber chu Rio Open a ni a. Wilcard hmanga inelna a hmachhawn Rio Open-ah hian second round-ah a tla nghal. Kum 2021 kum tir khan a vawi khat nan Grand Slam a hmachhawn a, Australian Open a hmachhawn. Australian Open-an men’s single khel thei naupang ber record thar a siam. A vawi khat nan Australian Open a hmachhawn tum hian . First round-ah amah ang thoa qualifier ve tho Botic van de Zandschulp chu straight set in hneh bawk mah se, second round-ah Mikael Ymer hneh lovin a tla. 2021 Croatia Open Umag – 2021 final-ah Richard Gasquet a hneh nawlh a, a vawi khat nan ATP title a hlawhchhuak.
Inelna hrang hrangah inlan zuiin hma a sawn chak viau a, ranking lamah pawh a sang chak viau a, kum 2022 kum tawp lam a nih meuh chuan Grand Slam-ah a champion a, World No. 1 a ni ta hial nghe nghe. Kum 2022-ah hian Grand Slam dang pathumah khel chhe lem lo mah se final a lut zo lo vek a, US Open-ah ropui taka inlanin final a lut ta nawlh. Final-a a khingpui Casper Ruud lakah awlsam takin hnehna a chang a, a vawi khat nan a champion a, World No. 1 a ni zui ta hial bawk. World No. 1 a nih hian kum 19 chauha upa a ni a, World No. 1 leh Year end No. 1 ni thei naupang ber a ni nghal a, Tennis-ah Arsi eng bik pa khat a awm belh.
|ha taka kum 2022 a hman liam hnuin hliamin a tibuai a, Austrlian Open a hmachhawn thei lo. French Open hmachhawn mah se semi-final-ah Novak Djokovic a hneh lo va, final a lut zo lo. French Open semi-final-ah a tlak laiin Djokovic a champion zui bawk si vangin Alcaraz hian World No. 1 a nihna chu Djokovic-a lakah a hloh. French Open zawh hnu lawk hian Grass lamah inelna a hmachhawn zui a, Queen’s Open-ah a champion vangin World No. 1 a ni nawn leh. No. 1 ni chungin Tennis-a inelna ngaihhlut hlawh ber Wimbledon a hmachhawn a, final-ah vawi sarih zet champion tawh Djokovic hnehin a champion zui ta hial nghe nghe.
French Open, Wimbledon leh US Open-ah te vawi hnih theuh a champion hnuin a la champion ngaih lohna Australian Open-ah a vawi khat nan a champion leh nawlh a, Tennis thiam bik a nihzia lantirin, hnuhma ropui a hnutchhiah.
Wimbledonz-a vawi hnih champion tawh Alcaraz-ah hian Nadal, Federer leh Djokovic te thatna hrang hrang a awm kim ang hiala sawi a ni. Federer angin thiamna ril a nei a, Nadal ang maiin thahrui a ngah a, Djokovic ang maiin a huaisen a, a paukhauh bawk. Kum 22 mi lek ni chunga Grand Slam title pasarih a lak theih nghal mai vangin Tennis player ropui ber la ni thei tur hial a ngaihna lian tak a awm.
Tennis-ah ‘Big Three’ tia an sawi Novak Djokovic, Rafael Nadal leh Roger Federer te hun a liam tan a. Tennis player zinga ngainat hlawh ber Roger Federer a chawl tawh a, ‘Clay Court lalpa’ an tih hial; Grand Slam-a vawi 22 champion tawh Rafael Nadal chuan kum 2024 khan a racket khaiin Tennis a chawlhsan tawh bawk. Grand Slam-a vawi 24 champion tawh Novak Djokovic meuh pawhin chuai lam a pan a, a tha a thum ve ta viau bawk a, Alcaraz leh Sinner te kawng dal turin theihna a nei ta meuh lo. ‘Big Three’ te hun tawp dawn lamah Carlos Alcaraz hi a rawn chawr nawlh. Tennis player ropui ber Djokovic a chuai lam tawh a, kum naupang zawk zingah el phak khawp thiamna, thahrui leh paukhauhna nei an tam bawk si loh vangin Alcaraz hma lam hun a eng leh zual a. Hun eng emaw chen chhhung chu inelna lian a awp beh thei mai rinna lian tak a piang nghal bawk.
Tarlan tawh angin ropui fal Djokovic chu chuai lam an nih tawh vangin Alcaraz tan huphurhawm a ni tawh lo va, a kawng daltu lian a tling phak meuh tawh lo. A kuam rualpui Holger Rune leh Jannik Sinner ten an inel zui viau tura ngaih a ni. Amah aia naupang hret Rune hian beisei a phak zui ta lo tlat bawk. French Open 2025 final-a a hneh tak leh amah aia upa hret Sinner lakah 10-6 ngawtin a chungnung zawk mek bawk. A aia u hrette pawhin an ngam lo deuh zel ta mai bawk si a, Alcaraz rawn lan hun hi a fuh chho riau a, atan vanneihna a ni zui ta bawk.
Kum 2020-2022 thleng khan Covid 19 hri danna a lak loh vangin Novak Djokovic-an inelna tam tak a hmachhawn thei lova, ranking-ah pawh a tlahniam duai duai. Hetih hun lai hi Nadal in hliam ngun lai a lo nih bakah player chetha fal an awm meuh lo. Chumi hunah chuan Alcaraz hi an pawng thut a, No.1 hial a rawn ti ta chiah bawk. Hun rei tak chhung chu Jannik Sinner hnuaiah awmin, No 2 ni reng mah se 2025 kum tawp lam a nih meuh chuan Ranking lamah Jannik Sinner chunga chuangin World No. 1 a rawn ni leh ta hial. Kum 2024 leh 2025-ah Alcaraz leh Sinner ten Grand Slam palite an awpbet a, pahnih ve vein an insem zawn. US Open 2025 final-ah Alcaraz leh Sinner hi an intum a, a elpui lian Sinner hnuaichhiahin Alcaraz hi awlsam takin a champion. Khati khawpa Sinner a hneh thei khan Alcaraz ropui zia, a ropui zual zelzia a lang chiang leh zual.
Carlos Alcaraz thiamna, a huaisenna leh thahrui a ngahzia pawh khawvelin a hrechiang ta viau. Inelna hrang hrangah a chetha thei viau zel bawk nen dam tha leh tlo taka a kal zel thei a nih chuan player ropui ber la ni hial thei tura ngaih a ni. Kum 22 mi lek ni chunga hun ropui tak tak a tawn rual hian kum 22 leka upa a ni chungin hliam a nei thei riau tlat thung. Hliam vangin French Open a hmachhawn tluan thei lo tawh a, hliam vang vekin Australian Open a hmachhawn thei lo bawk a. French Open 2023-ah Novak Djokovic laka a chak loh chhan pawh kha hliam vang bawk a ni leh. Thahrui leh thiamna nei tha viau mah se hliamin a tibuai fo a nih chuan hmabak eng tak nei mek Alcaraz hi beisei phak lo takin a zuih ral thei a. A dam tha pangngai a nih erawh chuan ‘Alcaraz nge nge’ kan la tih fo a rinawm.