Nimin khan Vienna, Austria-ah Taylor Swift ‘Eras Tour’ concert neih tan tur a ni tawh a, mahse, police ten August ni 7-a mipahnih an man te an dawpna atangin concert hi rawlrala che ten beih an tum tih an hriatchhuah avangin concert hi an thulh ta a ni.
Vienna-a thuneitu te chuan NBC News-in an kawmnaah an khawpui event lian beih tuma ruahmanna siamtu zinga pahnih an man thu an puang a, an miman te hian beih an tum zingah August ni 8, ni 9 leh ni 10-a neih tur Eras Tour concert a tel thu an puang a, hei vang hian concert hi an thulh ta a ni.
Event organizer Barracuda Music chuan an Instagram-ah he thu hi puangin, “Sorkar official-te hnen atangin Ernst Happel Stadium rawlrala che ten beih an tih nemnghehna a awm avangin, mipui him nan show kan lo ruahhman tawh chu thulh mai loh tur duhthlan tur dang a awm ta lo,” an ti.
Taylor Swift website pawhin heng show tum thum neih tura ticket leitute chu an ticket man ni 10 chhunga kir leh vek an nih tur thu an puang ve nghal bawk.
Police ten an man pakhat zawk chu kum 19 mi niin, ani hi Salafi-jihadist group ISIS nena inzawmna nei a nih thu Vienna State Police Director Franz Ruf chuan press conference neiin a puang a, an beih dan ruahmanna pawh felfai tak neiin, chemical an man tel a, hei hi bomb siam nana hman theih a nih leh nih loh an enfiah mek a ni.
Terrorist ten beih an tum avangin Austria-a Swift Eras Tour tur thulh
