Texas sabereka khuangkaihah mi 119 thi
Zirtawpni kal taa Texas chhim lam lailia sabereka khuangkaih avanga thi chu state pumah mi 119 an ni a, Kerr County bikah chauh mi 95 an thi tih thuneituten an sawi.
Kerr County Sheriff Larry Leitha chuan Nilaini thleng khan mi 150 chuang chin hriat loh an la awm tih sawiin heng zinga panga hi Guadalupe River kama Kristian hmeichhe naupang nipui camp-a lut leh an counsellor pakhat a ni tih a sawi.
Kerr County-a thi hi naupang 36 leh puitling 59 an ni tih thuthar lakhawmtute a kawmnaah Leitha chuan a sawi.
Chhanchhuah leh mi zawn hna chu khawl lian tak tak hmanga hnawm tifaiin an la thawk zui zel tih police-in an sawi bawk.
Zirtawpnia tui a len thut khan a tirah chhungkaw 100 chuang hmun himah sawnin mi 200 chuang an chhanchhuak a. Thenkhat chu an mu tui lai kaihthawh chawp an ni tih Kerrville Police Department (KPD) community services officer Jonathan Lamb chuan a sawi.
Naupangte camp-na, Camp Mystic-a counselor-a thawk pahnih, Maria Paula Zarate leh Silvana Garza Valdez te chuan ruah a sur tan atang khan a bengchhen em avangin an mu thei lo tawh tih an sawi.
“Khatianga ruah sur nasa kha ka la hre ngai lo,” tiin Garza Valdez-i chuan a sawi.
Lui hnaih camp-na hmun chu hnawl leh chirhin a khat vek tih Garza Valdez-i chuan a sawi a. Counselor thenkhat chuan insaseng a hun tih sawiin an tap chuah chuah niin a sawi a, sipai truck hmanga chhanchhuah an ni tih a sawi.
Zarate-i pawhin lui chu camp dang atanga tuiin a lak bungrua chi hrang hrangin a khat vek tih a sawi.
Texas-a chhiatna thlengah hian mi tam tak chuan thuneituten tui lian tur an sawi lawk lo chu mak an ti a, insaseng tura tumah tih lawk a awm lo chu an sawi zui nasa hle.
Mi thiamte chuan chhiatna thlen chhan hrang hrang ni thei an sawi zingah khaw awm dan uchuak tak bakah chawlh hmanna hmun awmna leh hman hun chu a tel niin an ngai.
Governor Greg Abbott-a chuan ruah a sur tur thu leh sabereka khuangkaih pawh a thlen theih thu hi an tichhuak ngei a; mahse, ‘a nasat zawng tur kha kan hre bik lo a ni’ tih a sawi.
Texas sabereka khuangkaihah mi 119 thi
