Tha zawka ‘Indian Standards’ zawm ve theih dan duang ho
Bureau of Indian Standards (BIS) in inkaihhruaina dan a siamte chak leh tha zawka Mizorama hman a nih theih dan tur relin Ningani khan State Level Committee on Standardization chu an chairman, chief secretary charge latu H Lalengmawia hoin an thukhawm.
Chairman chuan standardization chu thil pawimawh tak a ni a, sawrkar, mipui, sumdawng leh consumer-te tana hriat makmawh thil a ni tih a sawi. BIS deputy director general Anuj Bhatnagar chuan BIS hmalakna a sawizau a, Mizoram tana hmalakna awm thei hrang hrang sawiho zui a ni.
Sawi langsar zual zingah, Mizorama industry-te dinhmun zirchianna ‘Mapping of Industrial Landscape of Mizoram’ neih leh data mumal zawk neih; bungrua leh thil leituten awlsam zawka ISI chuang an hriat theihna tur leh thuneitute hnena awlsam zawka complaint an thehluh theihna atana duan, mobile application – BIS CARE app mipui hnena puanzar; village council-ten BIS inkaihhruaina siamte tha zawka an zawm theihnana zirtir tih a tel.
Sawiho langsar dang:
8 Sawrkar mi pawimawhte tan, sawrkar hmalakna – scheme leh programme kalpui danah Indian Standards zawm that a nih theihnana intuaihriam tir
8 Administrative Training Institute hnuaia training programme-ah public administrator tha leh rintlak chher chhuah a nih theihnan training module-ah ‘Standardization and Quality Ecosystem’ telh
8 BIS-in officer kum 35 hnuailam tana a buatsaih thin, Young Professionals Programme-a tel ve dan ngaihtuah
8 Sawrkar bungrua leh thil dang dik taka lei a nih theihnan State Procurement Policy-a BIS kaihhruaina dan a siam zawm.
8 In sak dan tha leh him zawk a awm theihnan BIS-in national building code a duante chak zawka kalpui tura hma lak.
8 Sawrkar office leh damdawi inah, mipui nena indawrna felfai leh tha zawk a awm theihnan Quality Management Systems – ISO 9001 kalpui.
8 Zirna in (public/private) tana BIS sponsored ‘Standard Club’ din chungchang (Mizoramah school 4 chiahin an la din) leh BIS Standard Club din tura BIS Guwahati Branch biakpawh theih a nih dante sawiho a ni.