Tripura sorkar chuan Thaidawr tlang panna kawngah solar street light a siam a, a tlangah bungrua an chhek a, in te pawh an sa tawh niin Phuldungsei atanga thudawnna chuan a sawi a.
Mizoramin Village Council a dinna Phuldungsei khuaah hian chhuah lam chu Mizoram tia sawi thin a ni a, chumi huam chhungah chuan Thaidawr tlang a awm a, mahse Tripura sawrkar hian a ta neih avangin tourism destination atan a cheibawl mek niin a lang.
Tun hma hun rei tawh tak atang khan Thaidawr tlang inchuhna thawm hriat tur a lo awm tawh thin a. Mizoram lamin ‘kan ta’ kan tih laiin cheibawl emaw, humhalh emaw kan tum loh avang hian Tripura hian tourism destination atan a tuaihnum ta niin a lang.
Tripura state chhung Jampui tlangdunga Zofate inzawmkhawm pawl lian tak Mizo Convention chuan kum thum vel kaltaah khan Mizoram leh Tripura ramri chu boruak tha tak hnuaia chinfel an duh thu an lo auchhuahpui tawh a. An duh dan chuan, chief minister level-a inbiak ni se, an inremna ang ang chu kan pawm ang, an ti a. Ram buai anga a awm chuan Jampui tlangdunga Mizote hian kan tuar thei dawn a ni, an ti.
Thaidawr tlang chungchangah hian, Mizorama sawrkarna fawng lo chelh tawhte zawng zawng khan tih thamin hma an lo la ngai lo niin a lang a. Thawm a han awm deuh hi chuan eng eng emaw awrawl an han chhuah thin na a, chinfel duhna tak tak a awm lo niin a lang. Tripura sawrkar nena chinfel tuma hmalak aiin, political game atan kan hmang duh chauh ni maw…
Tun hnaiah ration card chungchangah thawm a han awm leh laih a, Tripura sawrkar nena sawifel tumna aiin keimahni leh keimahni kan inbengberek buai tawk leh viau bawk.
A nih nih kan nih rawih ngam hi a tul viau tawh niin a lang. Vawt si lo, lum si lo anga awm reng hian khawi mah min thlen dawn lo. Helai tlangdunga Mizo awm ten, ‘tih chian’ an duh thu an auchhuahpui hi a pawimawh hle.
Tuna a lan danah hi chuan, Mizoram sawrkar hian ‘kan ta’ ti chung siin a humhalhna lamah kut a thlak ngam leh si lo ni berin a lang a. Google lamah han lut ila, “Thaidawr peak is the highest mountain peak in the state of Tripura” a lo inti kuau a, heng te hi kan theng thawngah a lut lo em maw ni teh reng ni…
Thaidawr tlang chinfel a tul…
