Thailand PM Paetongtarn Shinawatra

Thailand parliament chuan Paetongtarn Shinawatra, billionaire tycoon leh leader hlui Thaksin fanu chu prime minister atan an thlang.
Kum 37 mi lek niin Thailand prime minister naupang ber ni dawnin hmeichia PM ni thei pahnihna chiah ni bawkin a ni (aunt) Yingluck chu PM a lo ni tawh bawk a ni.
A hma lawkin Prime Minister ni lai Srettha Thavisin chu constitution court-in PM atangin a hnawl a. Thavisin leh Paetongtar te hi Pheu Thai Party, kum 2023 inthlana pahnihna dinhmun chang leh mahse ruling coalition a tel an ni.
Paetongtarn hian Thailand economy tlahniam mek zel tundin lehna kawngah hna hautak tak a kutah a tla dawn a, chu mai bakah military coup awm thei leh court inrawlhna avanga tun hnaia an party administration pali lai hnawl tawhna te chu a thlen nawn tawh loh nan hma a lak a ngai dawn a ni.
“Thais tin tena nun tha zawk an neih theih nan leh hun remchang tha zawk kan siam theih nan mipui ten rinna an nghah ngam ka beisei takzet a ni,” tiin Paetongtarn chuan a sawi.
A dinhmun chelh tur chuan a luahkhah thu sawiin phurna avanga a khurh hial thu a sawi bawk a. Tichung chuan an ram kaihhruai tur chuan a tha ber leh fel ber a ni lo tiin a sawi bawk a.
“Mashe ka tum a ruh a, team tha ka nei bawk a ni. Ka team te an tha a, tawnhriat an ngah a, ngaihdan intawm kan nei a, chu chu ka ngaihlu hle,” tiin a sawi bawk.
Paetongtarn hi mi 319-in an thlawp a, mi 145-in an thlawp lo thung a, tihian tun hnai kum sawm hnih chhunga Shinawatra family prime minister ni thei palina chiah a ni bawk a.
Midang pathumte zingah a pa Thaksin leh a ni Yingluck te pawh telin an pahnih hian military coup emaw constitutional court hmanga banin an awm ve ve thung a.
Constitutional court vek chuan Nilaini khan a cabinet-ah lung in tang tawh lawyer a ruat avangin PM ni lai Thavisin chu a paih thla bawk a ni.
Paetongtarn chuan Srettha ban a ni chu pawi a tih thu a sawi a. Mahse Srettha a biak hnuah tun hi party leh ram tana hmalak hun a ni tiin a sawi.
A pa Thaksin chuan theihtawp chhuaha hma la tura duhsakna a hlan thu sawiin kum upa tak ni tawh chunga Prime Minister dinhmun a chelh tur hmu theia a awm chu a lawm thu a sawi bawk.
Paetongtarn hi Thailand elite school chhuak niin chumi hnuah UK ah unversity a kal leh a, kum tam tak chhung Shinawatra family’s Rende hotel group a enkawl a, Rende hotel group-ah hian a pasal chu deputy chief investment officer a ni bawk.
Kum 2021 khan Phey Thai party zawmin October 2023 khan party leader atana ruat a ni zui bawk.
Paetingtarn appointment hian Thailand top leadership-ah fresh energy a thlena ngaih niin Pheu Thai member te pawhin an party chu sang zawkah a vawrhchhoh leh theih beiseina an nei sang hle.
Thaksin Shinawatra kha kum 2001-ah prime minister niin a term hnihna erawh kum 2006 khan hma takin military coup hmanga tihthluk a ni a. Kum 15 teh meuh Thailand chhuahsana a tlanchhiat hnuah nikum October khan Thailand a let leh chauh a ni.
June thla khan monarchy hmusit tia thubuai siamak niin Thailand notorious lese jameste law hnuaia thubuai siamsak zinga lawk ber a ni bawk a. He dan hi politics lama hmelmate beih leh hrem nana lekkawh lar tak a ni bawk.
Thaksin farnu Yingluck pawhin kum 2011 inthlanah khan hneh takin chakna a chang a, mahse, ani pawh court in a disqualify zui mai a, a sorkar pawh sipai ten an tithlu zui leh bawk a, tunah Thailand chhuahsanin ram dangah a cheng mek bawk.
Paetongtarn hian nikum intlanah khan Pheu Thai tan campaign in raipuar nasa tawh tak chunga a campaign chuan mi tam tak ngaihsan a hlawhtir phah a ni.
“Kum riat chhung teh meuh sorkar paihthlak boruak awm reng karah mipuite hian politics tha leh ram tana thaa kal an duh tawh a ni. Politics an nunkhua that nana puitu an duh a ni,” tiin a sawi.
Thailand inthlan hnuhnung berah khan seat la hnem ber leh chakna chang Move Forward te chu military-appointed senate chuan sorkar an siam an phalsak tlat lo va, chuvangin Pheu Thai kaihhruai coalition piangin Srettha chu PM a ni ta a ni.
Tun thla tir lam khan constitutional court chuan Move Forward party chu thiatin an hruaitu lawk 11 te pawh kum tam tak politics khel thei lo turin a hrem bawk.