Thalaite zingah inchhunga hna thawh tur awm nu leh pate kuta dah a, che ngai lo an tam tih IAS retired Lalnunmawia Chuaungo chuan a sawi a. Inchhunga tih tur tul khawih tam turin a chah.
St. Joseph Higher Secondary School Aizawl chuan kumina HSSLC exam-ah result tha tak an neih an lawm a. He hun hmanpui tura an sawm chief information commissioner Lalnunmawia Chuaungo, IAS (Rtd) chuan tunlaiah nula tlangval mahni ina eirawngbawl ngai lo thiam lo, nu leh pa pawhin an tih tir lohte an awm tih a sawi. “An tih tir lo che u a nih pawhin ti rawh u, mi puitlinga in chhuah na tur a ni. Inah in tih theih ang tawk hna zawng zawng thawk rawh u, tih tak takin engkim ti ula, in inchhir loang. Tuarchhelna leh puitlinna kawnga min hruaitu a ni,” a ti.
“Khawvel nuna zawm tur chu engkimah, zirna, eizawnna leh rinna ni se, kan kalna lamah lum chuan luma vawh chuan vawh law law tur a ni. Tumruhna leh tih hram hramna hi kan nunpui tlat tur a ni,” Lalnunmawia Chuaungo hian a ti. Zirlaite chu an inchhir lohna’n an thawh theih zawng zawngte thawka inchhungah engkim ti turin a chah. “Zirna kan ngaipawimawh hmasa ber anga, kohhran leh khawtlanga inhmanna in zirna a tibuai tur a ni lo,” a ti bawk.
Education tum ber sawiin, “Ram, khawtlang, mahni leh chhungkua tana chhenfakawm nih hi zirna tum ber a ni,” CIC hian a ti a. Central service lama Mizote tlin kan harsat tak avanga zawhna tam tak awmah zirna mawhpuh a nih thin thu sawiin, zirna chu khawvel khawi hmunahmah sawiselbo a awm lo tih a sawi a. Sawrkar lama a hnarkaituten ruahmanna an siamfel a ngai tih Lalnunmawia chuan a sawi. Chumi atan chuan rawtna thlen tam a ngai, tiin, zirlaite chu sawrkara zirna thatna tur rawtna thlen ngam khawpa huaisen turin a chah.
St. Joseph HSS hian class 11-12 ah Arts, Science leh Commerce neiin, a pathumah hian kumin HSSLC result-ah top 10 an nei a, top 10-a lang zirlai 15 an nei a ni.
Thalaite inchhungah che tam rawh u – Lalnunmawia Chuaungo
