Thalaite inherrem a ngai – MJA president

Mizoram insingsa chho mekah environment humhalh leh hmasawnna hlawkpui zawngin Mizo thalaite kan lo inherrem a ngai tih
MJA president C Lalrambuatsaiha chuan a sawi.
Aizawl City College Joint Students Union (ACCJSU) chuan Aizawla college hrang hrang zirlaite tan debate-a inelna a buatsaih a, Thawhtanni khan final neih a ni.
Final leh a kharna hun hmanpuitu MJA Gen.Hqrs. president C Lalrambuatsaiha chuan, hnam changkang apiangin environment humhalh a pawimawh zia an hrechiang a, an humhalh tha tih sawiin, “Kan chhehvela awm nungchate humhalha venhim hi kan tih tur a ni tih thalaiten hria ang u,” a ti.
Mizoram a insingsa mek tih a. Zoram chu Pathianin engemaw atan a buatsaih tih a sawi. “Inunaute kan sawi thin a, kan inunauna a thawh nat zawk nan rem a ruat a nih ka ring. Hmasawnnain min nuai mek a, envirnment a chhiat nasat loh nan ngaihtuahna sen a ngai a, thalaiten kan ngaihven a ngai. Hmasawnna nasa zawk a la rawn thleng zel dawn a, chumi atan chuan thalaite kan lo inherrem a ngai,” a ti. Ram changkang zawk leh India ram hmun thenkhata an tih angin, thing tereuh te te phun aiin, thing lian tawh phun a tha zawka a hriat thu a sawi bawk.
MJA president chuan Mizo thalaite central service-a lut pha tura an tan a ngai, tiin, “Kan state-a hna lian zawng zawng hi hnam dangin an luah zo vek mai ang tih a hlauhawm a, kan vei a ngai,” a ti. Oil lak chhuah leh rel kawng siam belh zel chungchangah hna lian leh tha zawk thawk thei tura inbuatsaih turin thalaite a chah tih a sawi a ni.
Debate-a inelna hi ACCJSU leh Environment, Forest & Climate Change department tangdun buatsaih a ni. Final ah hian pakhatna – Pachhunga University College, pahnihna Govt. J Thankima College, pathumna Govt Zirtirti Residential Science College an ni.