Lalchhandama Colney
Ph – 9862982321
A hmasain thalaite chibai ka buk che u, thalai ka ni tawh lo na a, zawnglai hnahkhat chu ka la ni ve tho a nia.Kan hriat fo angin hnam naupang tak kan la ni a, chuvang chuan, thalai lam te phei chu zirtir ngai, hriatthiam ngai, kan la ni leh zual a ni. Tun hma deuh te phei kha chuan nu leh pa lam te pawh hi ho ve tak tak, ngaihtuahna nei thui vak lo, eng emaw harsatna, buaina tawh thut pawha tal buai ve ta rum rum mai, kutdawh ngai hial ta mai pawh kan officer then khat zingah te pawh sawi tur an lo awm tawh a ni. A tlangpui thuin, vawiin thleng hian kan pawisa neih ang ang te kan hmang ham ham zel a, a nei deuh te tih dan kan entawn a, hetianga ti ve thei lote chu kan la ngaihniam, dah hniam viau zel a ni. Ka lo hmuh ve dan mai mai chuan Mizo te, a bik takin thalaite, hausa, changkang anga lan hi kan tum hlawm, mahni nihna dik tak anga lang ngam hi chu an tam lo khawp ang. Lemchang nun hi kan kalpui, puitling zawkte zingah pawh hian a ni ve tho mai.
Kan Dinhmun
A tlangpui thuin nu leh pate hnuaia lehkhazir, awm mai mai, hna zawng mek, etc.,kan ni hlawm. Mahnia intodelh hi chu an awm ve nual a, mahse, an tam lo. Tunlaiah chuan tlema mi pangngai deuh chin te hi chu kohhran thalai, YMA,etc.,ah te an inhmang viau thin. College zirlai, training eng eng emaw nei, taima leh fel tak kan tam viau a, nu leh pate chawm tura nupui/pasal neih erawh kan la uar hle. |halaite zingah lehkhathiam tak tak, doctorate degree nei te pawh kan awm ve ta nual mai. College, University result han en te pawh hian an pass satliah mai pawh ni lo, 1st class, distinctiongold medalist-te pawh hi an tamin an awm leh nual thin. An tia lawm, tak tak nge ni phei chu ka hre lo a, tun hma kan engineer, doctor,etc.,hlep ru nasa, zu heh nasa, officer lian eiru nasa kan tih thin hote kha, thalai an nih hun lai chuan fel tak tak, nu leh pa thuawih thei tak tak, kohhran thalai leh YMA velah pawh an hriat ruk, ani hi chu, an tih thin te kha an ni hlawm. A bul chu an tan tha a, mahse, an ziktluak ta lo, siamtu chu an hre tawh lo, theihnghilh tawh tlat mai, a tawp thlengin an rinawm ta lo, an chan tur chu hremhmun, an la damlai pawn nuam chuang lo, damlai hremhmun tho a ni.
Tuh Rah Seng
He tawngkam hi chu kan hre lar viau hlawm tawhin ka ring, Bible ami, mihringte min hrilh, zirtirna a ni deuh ber mai. Hman lai chuan keini Mizote pawh loneiha eizawng deuh vek kan ni. Buh-te kan tuh a, thlai hmun, thei hmun, etc.,te kan siam thin. Tichuan, miin a huanah emaw grape, dawnfawh-te a chin chuan kum tawpah grape-te, dawnfawh-te a thar dawn a ni. Hetih lai hian ser-te, theihaite, a seng daih dawn lo a ni, a chhan chu anni hi chu a huanah khan a ching/tuh ve lo, grape kungah ser chu a rah thei lo, dawnfawh kungah pawh theihai chu a rah thei lo. Hetiang ang dinhmun hun laia Isua sawi kha a ni, a hlui lutuk tawh em mai, kan ti mai thei, mahse, vawiin thlengin a la dik reng a ni. Keini pawh vawiinah thil tha kan tih chuan chu mi rah chu kan la seng dawn, thil tha lo kan tih erawh chuan chu ngei chu kan la tuar let leh dawn. Hriselna tur atana zuk leh hmuam, ei leh in, hnathawh te ka tih loh a, fimkhur, taimak loh chuan kum 5/10 alo ral leh meuh chuan ti ve lote nen chuan kan inthlau tawh khawp ang. Kan thawhrim chuan, thawhrim rah, inthlahdah chuan chu mi rah chu.
Hun A la Awm E
Leilung danah thalai zawkte chuan he khawvelah hian hun kan la nei nual a ni. Hnathawh tur nei lo, peih lo ka nih pawh in, zawnna hun, insiamthatna hun kan la nei. Inkhawm ngai vak lo ka nih pawhin hun tha a la awm, nun kawng dik lo zawh mek ka nih pawhin insiamthatna hun a la awm. Hetih lai hian kan thla a muang sual ang tih chu a hlauhawm, nat lawk awm lem lo pawh hian a thih thut theih, vawiinah hlimin, nui mah ila, naktukah eng nge lo thleng dawn a hriat si loh. |halai, rinawm leh taima tak tak te tan pawh thil tha tihna hun kan la nei zel, vawi hnih khat tih duh tawk mai lovin, uar deuh deuhna hun kan la nei. Rawngbawltu fel leh tha tak, mahse, chhungril lam nun hah leh buai ru riau ka nih pawhin hun ala awm, Pathian thu chu i hre viau a, mahse, i nunpui thei lo, thlamuang thei lo, i hriatna mai kha chuan a chhandam lo tlat che. Hetih lai hian thlarau tel erawh chuan Pathian thu tlar khat lek pawh hian mihring nun pumpui hi rei lo teah a thlak danglam vek thei a ni. Bible-te kan chhiar a, sermon-te kan ngaithla a, a thente phei chuan kan chhiar chhuak hial ang, hei hi a tha lutuk a ni. Thil pawimawh tak pakhat kan la nei leh a, chu chu thlarau thianghlim awmpuina a ni. Hei hi dil thin tur a ni, ani nen hi chuan engkim a fel vek zel, dilna hun i la nei, dil mai rawh taima takin.
Thu tha tak tak kan han sawi ve nual a, mahse, kei hi that lai hun sawi tur nei lem lo ka ni, chuvang te pawh chu a ni ve ang, ka vawiin dinhmun hi a ropui lo hle mai, mi tawngkam tha tak ngial pawh hi ka dawng khat, kil khata lo ngawih ve mai mai kha a ni deuh ber mai. Mi hausa leh Lazara-te atanga, hremhmun atanga ram thim vei te pawh kha ang, ka inti ve deuh.Mahni pawhin tih hleih loh, mi tih atana tih leh ringawt thin hi chu awmzia a awm thei tak tak thin lo. Ka-a sawi hi chu bengah a lut a, leh lamah a chhuak leh nghal mai thin, chetzia/nuna kan sawi erawh mi thinlungah a cham reng thin. Aw le, kan vanglai/thatlai hun te, min siamtu Pathian pawh hian chen a phal, amaherawhchu,vaukhanna(warning)erawh a siam, kan hman dan azir zelin rorelna a la siam dawn, eng tin nge ni ang le,..hmm,.eng pawh ni se, i siamtu hriatreng tum phawt mai rawh.