KVK Kolasib, State Agricultural Management & Extension Training Institute (SAMETI) leh National Institute of Extension Management (MANAGE) tangho chuan thingtlanga thalaiten vawk vulh leh changpat leitha siam hmanga eizawnna an neih theih nana tuaihriamna Kolasib-ah an buatsaih.
He hun hmanpuitu Kolasib district bawrhsap John LT Sanga chuan Kolasib district thalaiten eizawnna tlak thiamthil an neih theih nana sawrkar office hrang hrangin training an buatsaih thin chu lawmawm a tih thu a sawi a. Thiamthil chhawrtlak leh rintlak, khawtlang tihhmasawnna atana thil tangkai zir chhuah tum theuh turin a fuih. Mithiamte kaihhruaina hnuaia inzirtirna mumal tak kalpuina chuan huan lo ram leh ran enkawl dan kalphung hlawk leh sawt zawk a hrin chhuah thin avangin intodelhna kawngah pawh tunlai thiamna thar hman tangkai a pawimawh tih a sawi a ni.
Training hi March 1 thleng kalpui tur niin Natural Farming Society, Serlui Zau Kawnpui leh Piggery Farming Society Kolasib atangin mi 30 an tel a. Vermi-composting leh vawk vulh dan, eizawnna atana hman tlak khawpa inruahman dan tur, natna hrileng laka inven dan turte zirtir an ni.