Thalaite tan Mizoramah Skill
Development Centre din ngen
Sawrkar laipui dawra New Delhi-a kal Labour, Employment, Skill Development & Entrepreneurship (LESDE) minister Lalnghinglova Hmar chuan Ministry of Skill Development & Entrepreneurship (MSDE) minister Jayant Chaudhary a hmu a, skill development-a Mizoram hmathlir leh mamawh a sawipui.
Mizo thalaiten skill-ah talent tha tak an nei a, India ram pum huap intihsiak – IndiaSkills competition-ah pawh medal engemawzat la in, WorldSkills competition-ah Mizoram atangin India aiawh pahnih an tel tih LESDE minister hian a sawi a. Mizo thalaite theihna haichhuak tak tak turin Mizoramah Skill Development Centre changkang leh liantham neih a tul tih Union minister hnenah hian ziakin a thlen a. Tihpuitlin ngei a tum tur thu a lo hrilh.
MSDE hnuaia peng pawimawh pakhat – Sports, Physical Education, Fitness and Leisure Skills Council (SPEFL-SC) kaltlangin sports kaihhnawih job role hrang hrangah skill development training a taka kalpui theih dan tur Lalnghinglova Hmar hian sawiin, hemi hmang hian Mizo thalaite tuina leh thiam zawng pahnih – sports leh skill development kaihkawp theih nia a hriat thu leh, hemi chungchang hi ziaka Union minister hnenah a thlen tawh thu a sawi a; Union minister chuan Mizoram sawrkar lehkha thehluh a lo hmuh tawh thu leh tha a tih thu sawiin, MSDE hnuaia Sports Sector Council-ah a kalphung ennawn mek a ni tih a lo hrilh a ni.
LESDE minister hian Ministry of DoNER secretary Chanchal Kumar pawh a kawm a. DoNER chu hmarchhak state-te tana ministry pawimawh tak a ni a, he ministry hnuaia sports project dil theih loh emaw tih thin chu hriatsual palh a ni tih an sawidun. DoNER ministry hnuaia Mizoram project leh sum dinhmun thlir chungin, state sawrkar anga hmalak ngai pawh an sawi dun nghal a ni.
Thalaite tan Mizoramah Skill Development Centre din ngen
