Mizo Academy of letters (MAL) te’n 2023 chhunga Mizo lehkhabu tha ber atana an thlan chu “Pangparhnima” tih a ni a, a ziaktu chuan a lehkhabu hi thalaite thawnthu tiin a sawi.
|halaite thawnthu a ti a, thalaite tana a ziah a nih thu pawh sawiin, thalaite nun tarlanna thawnthu a ni tiin a sawi.
“Pangparhnima” hi novel a ni a, a ziaktu Ahmangaihi Khiangte hian thla thum vel a ziak. 2021-a a ziah tawh kha a ni a, July ni 18-a a ziah tan, October ni 20-a a zawh a ni.
Lehkhabu atana a ziah a ni lo a, youtube-a chhiar atana a tih a ni. Youtube channel a nei a, “Pangparhnima” pawh hi he channel-ah hian ama’n a chhiar thin. A beisei aiin miin an lo duh a, a buin a buatsaih ta a ni.
A bu-a buatsaih pawh hi a tum lawk lo; nikum khan dahthat ve atan tiin bu tlem azawng, bu 20 bu 30 vel chhuta a thian hnaite pek a tum a, mahse lo duh ve an awm tak nual avangin a duh apiangte chhiar theih turin a ti ta law law a ni.
“Bu 20 bu 30 vel print ila, thiante ka pe ve ang ka ti a. Mahse whatsapp group-a ka’n sawi khan, lo duh ve kha an olo awm sia a, tiang hian kan chhuah ta law law a ni,” tiin a lehkhabu lo pian dan a sawi.
Ahmangaihi hian a lehkhabu hi thalaite thawnthu a ti a, he lehkhabu ngainate’n an ngainat chhan han sawi fak tur a hriat loh thu a sawi rualin, “|halaite thawnthu a ni a, chuvang chu a ni ang, ka hrethiam chiah lo,” a ti.
He thawnthu a ziah lai hian tleirawl insual leh insual rawn a tam niin a sawi a, chutiang chu social media-ah a hmuh thin thu sawiin, “|halai an duhna lam lama tlante kha, vawi tawhsual tawhin an nun a nghawng nasatzia kha ziah ka tum ta a ni,” tiin he thawnthu a phuah dan a sawi.
“Entir neiin ka ziak lo a, entir nei a ni lo. Thil awm dan ka sawi zawk,” a ti a, “Ka duh dan ang thlapin ka ziakin ka hria,” a ti bawk.
Ahmangaihi Khiangte hian a lehkhabu hmasa ber hmangin Book of the Year lawmman a dawng dawn a, Thawhlehni hian MAL-in he lawmman hi an hlan ang. Amah hi a la naupang a, 2018-a T Roman College atanga graduate a ni.
Thalaite thawnthu, Thalaite tana ziah
