Thangram Cultural Meet 2026 nei Hnam ri chu kham theih a ni ve lo: – Chief minister

Thangram Indigenous Peoples Movement (TPIM) leh MZP Gen. Hqrs tangdun buatsaihin Ronpur Assam-ah Ningani khan Thangram Cultural Meet 2026 neih a ni a. Kumin hi a tum hnihna niin, thupuiah “Unau kan ni” tih hman a ni. Hmanpuitu chief minister Lalduhoma chuan, history kan en chuan Cachar phaia khawsa hmasa chu Biate leh Hrangkhol an ni a. Thangram pawh AD 1490 velah Ranglong, Sakechep, Hrangkhol, Molsom, Chorei leh Kaipeng hnamin an lo luah tawh a. British an lo lian a, an inkarah indona a lo awm a. Vawiina Thangram kan tih bik Langkaih phai leh Singla phai mel 180 biala zau hi kum 1867 khan ramri kham fel tak neiin British leh kan pipute khan inremna an siam ta tih a sawi a ni.
“Ramriin min dai dan mah se, hnam ri chu kham theih a ni loa, ram hranah state hranah awm mah ila, unau kan nihna, hnam khat kan nihna hi uar takin kan lantir zel dawn nia,” a ti.
Inpumkhatna lama hmalaknaah Thangram mipuiin an thawhhlawk hle tih Lalduhoma hian a sawi a. Unau tanpui ngaite tana vehbur an khawn dan, thuchhuah siama unaute thlavang an hauh thin dan pawh an lo hre ve zel, tiin, “In chungah Mizoram mipui kan lawm a. Kan hnam huikhawmtu lian leh tangkai YMA, MZP leh kohhran, tlawmngai pawl dangte kaltlangin nghet takin invuan tawn zel ang u,” a ti.
Zofate huikhawm a, a tul anga tanpui zel chu sawrkar duh dan leh kal dan a ni tih a sawi a. Khawvel huapa Zofate inhuikhawmna tur Mizo Diaspora Cell chu CM office-ah an din tawh a. Hna pawh an thawk nasa a, mi tam tak an tanpui tawh tih a sawi. “Chutiang rilru putu sawrkar chuan Thangrama kan unaute pawh hi a ngaihthah ngai loang che u. In tana dan hnuaia tih theih kan neih chu kan ti zel dawn a. Fahrahin kan kalsan loang che u,” a ti.
Tunhnaiah thenawma Zofate delh chin ramah harsatna a thleng hlawm tih chief minister hian a sawi a. Heng harsatna lo thleng hi Pathian remruata lo thleng, kan thatna tura a rawn tirh a ni loang tih sawi theih a ni lo, tiin, engkim ti thei Pathianin hna a thawh chuan, theih loh reng reng a awm lo a. A malsawmna kan dawn theihnan ‘A ram leh a felna’ zawn zel a ngai tih a sawi a ni.
Thangram Indigenous Peoples Movement president K Vana Chorei pawhin, Mizoram chief minister meuhin an ram a tlawh chu ropui an ti a, hetianga ram hruaitu lianin an tlawh an la hre ngai loa, an ram tana ni chhinchhiahtlak a tling tih a sawi.
“Tunah chuan kan chhehvela hnamdangte pawhin nu leh pa kan nei a ni tih min hmuhpui ta a. Mizoram mipui hian hetah in fate kan awm a ni tih min rawn hrereng rawh u,” a ti.
MZP president Dr C Lalremruata chuan, Thangrama Zofa awm hnam peng hrang hrang – Chorei, Sakachep, Hrangkhawl, Ranglong, Molsom leh Kaipeng chu inlungruala an tanrual a tul takzet tih sawiin, politics-ah pawh hlauhawm tham ni tura thu khat vuaa an awm a tul tih a sawi. “Pathianin hnamah min din a, Zofate rorelna pakhat hnuaia kan la awm hi MZP chuan kan ring tlat a, chumi tur chuan kan awmna hmun theuhah tawngtaia dilin kan inlungrual a ngai,” a ti.
Thangram Cultural Meet-ah hian hnam lam leh zai chi hrang hrang entir a ni.
‘Thangram’ tih hi ‘Khawthlang ram’ (Thlang ram) tihna a ni a. Mizo thlang tla hmasate luah ram niin, Assam state chhungah tunah hian khaw 24 vel leh mihring singthum vel an awm a. Heng rama cheng Zohnahthlak hnam paruk hian Thangram Indigenous Peoples Movement dinin kawng hrang hrangin hma an la thin a ni.