- Ngurdingpuia
Thangtharte tana mel lung phuntu hruaitu ah kan nei
- Ngurdingpuia
Mizoram-in medical college kan neih theihna atan sulsutu, thangtharte tana mel lung phuntu chu tunah Congress party-in hruaitu ah an nei mek a, suangtuahna leh a tak ram thleng lo tur sawi ve ngai lo a ni tih Congress Thalai hruaitu Ngurdingpuia Pachuau chuan a sawi.
Thawhtannia Congress Bhavan-a inkhawmah Congress Thalai senior vice president Ngurdingpuia Pachuau chuan, Congress sawrkar laia engkim tihfel tawh, MNF sawrkarin phuailuai taka a chhunzawm leh suasam Falkawna Referal Hospital tur chu Congress sawrkar bawkin building hnuchhawn leh ram tawh thar thawhin, tun dinhmun a thlen theihnana sulsutu chu khatihlaia Health minister, tuna Congress president Pu Lal Thanzara a ni tih a sawi.
ZMC atang hian doctor zir chhuak 265 awm tawhin, final result nghak mek 22 an awm a. Internship training zo tawh leh ti mek bakah foreign atangin doctor 12-in internship an zo ve tawh bawk. Tunah zirlai 360 – 380 inkar awm nen, he medical college atanga doctor zirlai leh zir chhuak, admission ti mai tur belhkhawm chu, foreign atanga internship rawn 12 tel loin mi 745 an tling a, sawrkar leh private a thawk engemawzat an awm tawh tuih a sawi a ni.
“Thangtharte tana mellung pawimawh leh rohlu phuntu, dawt leh thu belhchian dawl lo, suangtuahna a tak ram thleng ngai lo tur sawi ve ngai lo kan nei hi kan vannei hle. Congress party-in Zoram hmasawnna atana a lo thawh nasat zia hi miten an chhutchiang a, an hre chho zel. 2028 inthlan huna party hma eng berah min ngai mek a ni,” a ti.
Mipuiin kan beisei loh anga sawrkarin thil a tih a, ro a relin kan ning thuai thin a. Kum 10 sawrkar mai ni lo, kum 5 tlin hma pawhin kan inning hman hle tih ZPM sawrkar hmaa term khat sawrkar chelhtute ah a chiang tih Ngurdingpuia hian sawiin, ZPM sawrkarin mipui hmaa an lo tiam zawng zawng an palzut a, an hotupa leh ZPM party-ah mipui rinna a tlahniam nasa a, anmahni vote-tute rilru an hliam mek niin a sawi.