Thawh chhuah neih hrim hrim a hlu
– Lalnghinglova Hmar
Ei duh si, ei tur zawn peih si loh chu a zahthlak a; eng hna pawh, a thawhchhuah zat a tam emaw a tlem emaw thawhchhuah neih hrim hrim a hlu tih LESDE minister Lalnghinglova Hmar chuan a sawi.
Women Centre Phunchawnga kum 2024 batch puanthui zirchhuakte chu Thawhlehni khan thlah an ni a, LESDE minister hian hmanpuiin, Women Centre kaltlanga puanthui zirchhuak mi 300 chuang an awm tawh chu lawmawm a tih thu a sawi a. 2024 batch zirchhuak 33 chu a lawmpui tih a sawi. An thil zirchhuah chu eizawnna tha takah an chan ngei a beisei tih a sawi bawk.
“Eng hna pawh, a thawhchhuah zat a tam emaw a tlem emaw thawhchhuah neih hrim hrim a hlu a; chutihrualin, mahni kutkawiha eizawngte zingah mahni lakluh zat tipung tura lian zawka hma lak theih dan dap thiam a tul,” a ti.
Tehfung hrang hrang hmanga zirlai titha thlanchhuahte hnenah minister hian puanthui khawl a hlan a. Puanthui khawl hi Usha Enterprise niin, Tuikual Presbyterian Pastor Bial Kohhran Hmeichhia leh Dawrpui Presbyterian Kohhran Hmeichhia ten an pek a ni. Amawii Hero chuan Women Centre hnenah hian scooty pakhat a hlan bawk.
Women Centre atang hian zirchhuak 314 awm tawhin, chu’ng zinga zaa 70 vel chuan puan thuiin ei an zawng tawh.
Thawh chhuah neih hrim hrim a hlu – Lalnghinglova Hmar
