Mizoramah vaihlo/kuhva kaihhnawih zu/ hmuam/ei thin zaa 58 chuang la awm zingah thawh hlima ban nghal thin zaa 24 chuang hret an awm. India ram puma state hrang hranga vaihlo lam chi ti an tam dan zirchianna – Global Adult Tobacco Survey (GATS) hnuhnung berah Mizoram chu ‘tobacco’ hman nasat lamah a hniam zawngin a kal ve ngei a, chuti chungin a mi cheng atanga tehin a titu tam ber pawl a la ni.
Vaihlo kaihhnawih titu tam lamah GATS-1 aiin GATS-2 ah Mizoram hi a hniam zawngin tla ve mah se, India ramah a sang pawl a la ni a, hmarchhak state ah pawh a sang pawl a la ni tho. Tripura (64.5%) chiah Mizoram (58.7%) aia sang awmin, a sang zawnga thang chho Assam (48.2%) ai pawhin Mizoram hi a la sang zawk tho a ni.
Mizorama ‘tobacco’ ti mek 58.7% zingah 34.4% chu vaihlo zial chauh ti/zu an ni a; 33.5% chu a zuk chi bakah a hmuam leh ei chi ti tel an ni thung.
Vaihlo ti thi zingah a zuk chi chiah ti zaa 25.1 an ni a, zaa 24.3 chu a hmuam/ei chi chiah ti an ni. Zaa 9.2 chu a pahniha ti kawp an ni a, vaihlo lam ti lo hrim hrim zaa 41.3 an awm a ni.
‘Tobacco’ ti thin zingah zaa 24.2 chu an thawh hlim (thawh atanga minute 5) chhunga ti nghal mai thin an ni a; zaa 41.1 chu an thawh atanga minute 6-30 inkara ti thin niin, zaa 19.5 chu thawh hnu minute 31-60 inkara ti tan an ni. Darkar khat hnua ti tan chauh hi zaa 15.1 an ni.
Thawh hlima vaihlo ban nghal chi zaa 24 chuang
