A hmasain, The Aizawl Post chanchinbu latu, chhiartu leh article thawhtu zawng zawngte, Krismas hlim taka hmang theuh turin duhsakna kan hlan a che u. Chutiang bawkin, kumthar lo thleng tur pawh, damtlang leh hlim taka hmang theuh turin duhsakna kan hlan bawk a che u.
The Aizawl Post tan chuan subscriber-te leh article thawhtute hi chanchinbu nunna (life-line) in ni a, in tel lo chuan he chanchinbu hi a kal thei lo a, kan tan chuan in hlu takzet zet a ni.
Chutih rualin, chanchinbu buaipuina kawngah eng eng emaw harsatna avangin han khaihlak changte a awm lo thei lova, power supply chhiat avanga chanchinbu tihchhuah theih loh chang pawh a awm ta zauh zauh a, chungah te pawh chuan dawhthei takin, kan harsatna min hriatthiampui thin a, a lawmawm kan tih rualin khang harsatna thleng thinah khan thupha kan chawi mawlh mawlh bawk a ni.
Kan subscriber zingah, chanchinbu hmasawnna tura thurawn tha tak tak min pe thin in awm a, kan lawm thin hle mai. He chanchinbu hi a tichhuaktute chanchinbu a ni mai lova, chanchinbu latu subscriber-te, article ziaktute hi a neitu vek in ni a, kan vai hian ‘The Aizawl Post Chhungkua’ kan ni. Chuvangin, a neitu rilru pu chunga kan diklohna leh tihsualah pawh a thangchhe zawnga pawn lama chhuahpui mai lova, a tul chuan hmaichhanah pawh thil awmzia sawiho thei tura inbuatsaih sauh sauh turin kan inngen bawk a ni.
Thuziak tha tak tak rawn thawhtute chungah lawmthu kan sawi mawlh mawlh. Article kan dawn zawng zawngte hi a vaiin tihchhuah vek kan duh em em laiin, chanchinbu-ah hmun (space) kan ngah tawk loh avangin kumin chhungin kan tichhuak vek thei lo erawh pawi kan ti a, in hriatthiamna kan dil a. Kum thar lamah pawh tichhuak chhunzawm zel thei turah ngai ila, in thiamna leh finnate mipui tana rawn luanchhuahpui chhunzawm zel turin kan sawm nghal che u a ni.
Pathian kaihhruaina duhawm tak chang tlang chunga kum thara inhmu leh theuh thei turin Krismas leh Kumthar Chibai vek u le.
The Aizawl Post Chhungkua
