The Beatles biopic a chang tur an puang

The Beatles biopic a chang tur an puang
Beatles biopic a chang turte an puang ta a, Harris Dickinson chu John Lennon lemah a chang dawn a, Paul Mescal (Paul McCartney), Barry Keoghan (Ringo Starr) leh Joseph Quinn (George Harrison) te chu Fab Four lemah hian an dawng tih an puang ta.
He biopic hi Sam Mendes direct tur a ni a, ani hi directing lama tawnhriat ngah tak niin, James Bond film ‘Skyfall’ leh ‘Spectre’ te pawh lo direct tawh, 1999-a ‘American Beauty’ a direct avanga Academy Awards leh Gilden Globe Award-a best director dawn tawh, lemchan khawvela a thawh hlawk avanga British chawimawina sang CBE dawnga, a hming bula ‘Sir’ tih thei a ni.
A film Sony Pictures in an buaipui niin, ‘The Beatles – A Four Film Ceinematic Event’ an ti a, film pali awmin, Beatles member pali tan a hrang theuhin biopic hi an siam dawn a, April 2028-ah cinema hall-a chhuah tura ruahman a ni.
Sam Mendes chuan heng film pali hrang theuh te hian Beatles member pali te hriatchian lehzual theihna remchang a siam dawn niin a sawi a, Beatles chu culture thar tichhuaktu, dam chhunga theihnghilh tawh loh tur nia sawiin, khawvel band awm tawh zawng zawnga ropui ber te zinga mi niin a sawi bawk.
Beatles biopic hi an member la dam Paul McCartney leh Ringo Starr te remtihna leh hriatpuina a siam tur a nih bakah John Lennon leh George Harrison estate te hriatpuina hnuaia siam a ni dawn a, an group leh right neitu Apple pawhin a vawi khat nan an chanchin pumpui leh music rights te film a siam phalna a pe bawk a ni.
John Lennon lema chang tur Harris Dickinson hi 2024 film ‘Babygirl’ leh 2023 film ‘The Iron Claw’-ah te chang tawhin, Paul McCartney lema chang tur Paul Mescal hi nikuma tlangzarh ‘Gladiator II’ changtupa a ni a, Ringo Starr lema chang tur Barry Keoghan hi Christopher Nolan-a film siam ‘Dunkirk’ leh Marvel film ‘Eternals’-ah te pawh lo inlan tawh, ‘The Banshees of Inisherin’ film avanga BAFTA Award (best actor in a supporting role) dawng tawh, Academy Awards leh Golden Globes-a best supporting actor-a nominate lo ni tawh a ni a, George Harrison lema chang tur Joseph Quinn hi Paul Mescal nena Gladiator II a lo chang dun tawh a nih bakah ‘Stranger Things’ season thar berah a chang bawk.
Beatles biopic hi 1960-a an indin tan atanga an hun tawp lam thleng, an tour leh studio vela an chetna te behchhan a siam a ni dawn a. An group hian Billboard 200 (albums) chart-a No.1 kai thei album 19 neiin, he chart-a No.1 album ngah ber an ni a, Hot 100 chart-a No.1 kai thei ngah ber niin, an hla 20 chu he chart-ah hian No.1 a kai thei bawk.
Beatles chanchin bechhanin documentary leh film budget sang lo deuh zawk te pawh an lo siam nual tawh a, 2009 kan John Lennon-a hun hmasa lam thlurbingna, Aaron Taylor-Johnson channa ‘Nowhere Boy’ tih an tlangzarh tawh a, 2022 pawh khan ‘The Beatles: Get Back’ documentary, darkar riat zet daih chu Disney+ ah an tichhuak tawh bawk.