Noah Kahan album ‘The Great Divide’ chu Billboard 200 (US albums) chart-ah a No.1 a, he chart-ah hian kar thum a No.1 tling ta a, tun kum 10 chuang chhunga he chart-a rock album No.1 ni rei thei ber a la ni. Hetihrual hian CORTIS pawhin a vawi khat nan top 10 album an nei ve ta a, Chris Brown pawhin top 10 kai thei album 13 a nei tling ta bawk.
Billboard 200 hi kar khat chhunga US-a album lar dan tehna niin, chart ranking hi album hralh tam dan atanga tehin siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Noah Kahan “The Great Divide” hi kar khat chhungin 1,32,000 an hralh leh a, chung zinga 1,09,000 chu streaming (on-demand official stream maktaduai 111.46) niin, album tak tak hralh chu 22,000 a ni bawk. Hei hi a kar thum nan chart-ah a No.1 pui leh ta a ni.
Chart No.1 hlui Ella Langley Dandelion chu 1,00,000 hralh lehin No.2-ah bawk a la awm.
CORTIS-in a vawi khat nan top 10 album neiin, album thar ‘GREENGREEN’ chu 87,000 hralhin No.3-ah a debut a, chung zinga 81,500 chu album tak tak hralhna niin, streaming atangin 5,500 (on-demand official stream maktaduai 5.91) niin, album-a hla a mala hralhna chu chhiar tham a ni lo.
CORTIS hian he chart-a lang thei album pathum an neihna niin, an album hmasa ‘REDRED’ chu No.30 a kai a, nikum khan an album dang ‘COLOR OUTSIDE THE LINES’ chu No.15 an lo kaipui tawh bawk.
Chart No.1 hlui Morgan Wallen “I’m the Problem” chu 85,000 hralh lehin No.4-ah bawk a la awm a, Michael Jackson album, No.1 te pawh lo ni tawh ‘Thriller’ chu 66,000 hralh lehin No.5-ah bawk a la awm a,a album dang “Number Ones’ pawh 65,000 aia tam deuh hralh lehin No.6-ah bawk a la awm. He album pahnih te hi a biopic ‘Michael’ cinema hall lamah an tihchhuah hnuah an rawn lar thar leh ta a ni.
Chris Brown album thar ‘BROWN’ chu 65,000 hralhin No.7-ah a debut a, chung zingag 60,000 chu streaming (on-demand official stream maktaduai 60.31) niin, album tak tak hralh chu 5,000 a tling bawk. ‘BROWN’ hi a album chart top 10-a lang thei 13-na a ni.
Chart topper lo ni tawh BTS ‘ARIRANG’ chu 44,000 hralh lehin No.7 atangin No.8-ah a tawlh a, chart No.1 hlui bawk Morgan Wallen “One Thing at a Time” chu 41,000 hralh lehin No.9-ah bawk a la awm a, Olivia Dean “The Art of Loving” chu 41,000 tling lo deuh hralh lehin Top 10 khartuah tangin, No.8 atangin No.10-ah a tawlh ta bawk.
‘The Great Divide’ a la No.1
