November 2021 khan The Weeknd hla hit ‘Blinding Lights’ chuan Chubby Checker hla ‘The Twist’ lehthalin Billboard Hot 100 (singles) No.1 of all time a rawn ni a, kum hnih hnuah chuan he hla hian Spotify-ah vawi tluklehdingawn 4 stream a hlawh thei ta a, Spotify-a hla hetiang zat stream kai thei hmasa ber a ni ta a ni.
The Weeknd, a hming tak Abel Tesfaye hi a chapo phah chuang lo, “Ka kutchhuak te a tluklehdingawn chu sawi loh, a maktaduai telin an lo duh ve pawhin thinlung a tihlim a nia. He hla hi miten an lo duh a, an lo ngaithla nawn ve tlut tlut thin hian min ti lawm takzet a ni,” a ti.
Blinding Lights hi November 2019 a tlangzarh kha niin, The Weeknd studio album palina ‘After Hours’ atanga a single pahnihna a ni a, Billboard Hot 100-ah kar li chhung a No.1 a, thla 12 chhungin chart top 10-ah lang zuin, hetiang ti thei hmasa bee a ni a, November 2021-a Billboard Greatest of All Time Hot 100 chart-ah pawh a rawn No.1 zui ta a ni.
He hla hian December 2022 khan Ed Sheeran hla hit ‘Shape of You’ lehpelin, Spotify-a hla stream nasat ber a rawn ni a, tunah chuan he streaming platform-a vawi tluklehdingawn 4 stream kai thei hmasa ber a ni ta a ni.
Spotify hnuaia global head of music Jeremy Erlich chuan, “The Weeknd hian Spotify-ah kumtin bung thar a rawn kai a ni ber mai. Tun ami pawh hi Spotify record hrang hrang a siam zinga pakhat a ni. Kan streaming platform pawh khawvel huapin a thang zel a, a music pawhin mi tam zawk a thlen phak phah ve zel a, a fans pawh an pung zel a ni. ‘Blinding Lights’ hlawhtlinna hian rimawi hi mite min thlunzawmtu tha tak a nih zia a lantir chiang leh ta hle a ni,” a ti.
The Weeknd hi Spotify No.1 artist a ni mek a, thlatin he platform-ah hian a hla hrang hrang ngaithlatu maktaduai 113 nei ang a ni a, February 2023 khan record siamin, Spotify-a thla khata ngaithlatu maktaduai 100 nei tling thei hmasa ber a lo ni tawh bawk.
The Weeknd ‘Blinding Lights’-in Spotify record a siam
