The Weeknd, a hming tak Abel Tesfaye, hla hit ‘Blinding Lights’ chuan music streaming service Spotify record a siam a, Spotify-a hla vawi tluklehdingawn 5 stream kai thei hmasa ber a ni.
‘Blinding Lights’ hi 2019-a a tihchhuah kha niin, kum nga chhungin Spotify-ah vawi tluklehdingawn 5 stream a kai thei a, he chanchinthar hi The Weeknd pawhin a follower maktaduai 78 te tan a Instagram Story-ah a dah chhuak nghe nghe a ni.
‘Blinding Lights’ hian he record a siamthu an puan hma lawkin, Billboard chuan he hla hi kum zabi 21-naa R&B/Hip-Hop hla lar berah puangin, Billboard-in an chart siam Top Hot R&B/Hip-Hop Songs of the 21st Century chart-ah No.1 a lo ni tawh a, he chart ranking hi kum 2000 leh 2024 tawp thlenga Hot R&B/Hip-Hop Songs chart-a hla chet that dan atanga tehin an siam a ni.
‘Blinding Lights’ hi November 2019 a tihchhuah kha niin, a studio album palina ‘After Hours’ atanga a single pahnihna a ni a, Billboard Hot 100 (US singles) chart-ah pawh kar li chhung No.1 ni theiin, thla 12 chhung chart top 10-ah a lang zui a, hetiang tithei hmasa ber a ni bawk. November 2024 khan history siam lehin, Billboard Greatest of All Time Hot 100 chart-ah No.1 a ni leh bawk.
He hla hian January 2024 khan Spotify-ah vawi tluklehdingawn 4 stream a kai a, hei pawh hi Spotify record tho a ni. Hemi tum chuan The Weeknd chuan, “Ka kutchhuak mi maktaduai telin an lo ngaihtlak avang pawha lawm tawh nak laiin, a tluklehdingawn tel chu lawmawm tak a ni. He hla hi a ngaithla tawh ten an ngaithla nawn leh thin hian min tilawm tak zet a ni,” a ti.
The Weeknd hian Spotify-ah hla vawi tluklehdingawn stream kai thei 28 nei tawhin, ‘Blinding Lights’ hi chung zinga pakhat chu a ni a, zaithiam zingah he streaming service-a vawi tluklehdingawn stream kai thei hla ngah ber a ni bawk.
The Weeknd ‘Blinding Lights’-in Spotify stream tluklehdingawn 5 a kai
