The Weeknd ‘Hurry Up Tomorrow’ a No.1

The Weeknd ‘Hurry Up Tomorrow’ a No.1
The Weeknd album thar ‘Hurry Up Tomorrow’ chu Billboard 200 (albums) chart No.1-ah a debut a, he chart-a No.1 kai thei album panga a neihna a ni. Hetihrual hian Chappell Roan pawhin Grammy best new artist award a dawn hlawkpuiin, top 10-a a rawn lang thar leh ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
The Weeknd ‘Hurry Up Tomorrow’ hi 4,90,500 hralhin, chung zinga 3,59,000 chu album tak tak hralhna niin, streaming atangin 1,30,500(on-demand official streams maktaduai 171.5) niin, hla mal hralhna atangin 1,000 a tling thei bawk.
‘Hurry Up Tomorrow’ hi The Weeknd album kar khat chhunga US-a a hralh that ber a la ni a. He album-ah hian hla pakua awmin, chu chu digital download a tlangzarh a ni a, a physical format (CD, vinyl leh cassette) hla 11 awmna edition a awm a, streaming edition hla 22 awmna a awm bawk.
Bad Bunny ‘Debí Tirar Más Fotos’ chu 94,000 hralh lehin No.1 atangin No.2-ah a tawlh a, chart No.1 hlui bawk SZA ‘SOS’ chu 82,000 hralh lehin No.2 atangin No.3-ah a tawlh a, Kendrick Lamar ‘GNX’ chu 65,000 hralh lehin No.3 atangin No.4-ah a tawlh a, Billie Eilish ‘Hit Me Hard and Soft’ chu 53,000 hralh lehin No.10 atangin No.5 a kai thar ve leh thung. Billie Eilish hi tun thla tira Grammy Awards semnaa khan a perform a, a album a hla ‘Birds of a Feather’ a perform a, hei hian a album hralh a tikal thar leh ta a ni.
Chappell Roan ‘The Rise and Fall of a Midwest Princess’ chu 49,000 hralh lehin No.14 atangin No.6 a kai thar leh ta a ni. Chappell Roan hian Grammy Awards-ah best new artist dawngin, a album-a hla ‘Pinky Pony Club’ a perform bawk a, hei hian a album hralh a tikal thar leh a, Grammy semna kar khata a album hralh nen khaikhinin 56%-in a pung.
Chart No.1 hlui Sabrina Carpenter ‘Short n’ Sweet’ chu 48,000 hralh lehin No.6 atangin No.7-ah a tawlh. Carpenter ian Grammy-ah khan best pop vocal album a dawng a, a hla hit ‘Espresso’ leh ‘Please Please Please’ a perform bawk.
Chart No.1 hlui Morgan Wallen ‘One Thing at a Time’ chu 45,000 hralh lehin No.5 atangin No.8-ah a tawlh a, chart No.1 hlui bawk Taylor Swift ‘The Tortured Poets Department’ chu 38,000 hralh lehin No.11 atangin No.9 a kai thar leh a, Gracie Abrams ‘The Secret of Us’ chu 36,000 hralh lehin No.8 atangin No.10-ah a tawlh ta bawk.