Aizawl Municipal Corporation chuan nimin khan thuchhuah siamin, MLA Hostel thlang kawngpui sira thei zuar mi 11 te chu loh theih lohin AMC Multi-Complex Tuikual South building chhungah an insawn a tul tawh, tih an hriattir a. Hei hi a chhan chu, MLA Hostel, Khatla building sak that a tul avang leh building hlui thiah a nih tak avangin, a sakna hmun tur lei laih a ngai a, chuvangin helai hmuna thut hi mihring tan a him lo, tih a ni.
AMC hian thei zuartute hi a lo duhsak thin hle mai a. Helai hmun hi tunhma chuan lirthei dinna (parking area) a ni thin a; Aizawlin lirthei park-na a mamawhzia chu kan hre tlang vek awm e. Chutih laiin, helai hmunah hian AMC chuan duhsak takin thei zuartute a thuttir ta daih a, agreement pawh kum 5 chhung atan December ni 3, 2019 khan an ziak thlap a. Kum nga a ral a, kum nga dang agreement an ziak leh a, chu chu June ni 30, 2023 khan a tawp a. Parking area ni thin kha tihtawp niin helai hmun hi street vending zone atan puan a lo ni leh ta zel a, thei zuartute hi an vannei hle a ni.
Parking area ni lai mek pawh thei zuartute duhsakna avanga tidanglam thei AMC thuneitute chuan, thei zawrhna hmunah an lehsak a ni. Mahse, hun a lo kal zel a, paking atanga street vending zone atana puang theitu AMC bawk chuan, “MLA Hostel building sak that a tul ta e, tuna in awmna lai hi chet velna tur a ni a, building hlui te thiah a ngai a, lei laih belh te pawh a ngai a, in thutna hi mihring tan a him dawn lo, chuvangin, in thutna tur pawh AMC Multicomplex Tuikual South, 3rd Floor-ah kan ruahman leh diam tawh e,” tiin thei zuartute hi an hrilh ta a ni ber.
Insawn chhuak tura hriattirna hi January ni 6, 2026 khan President, Thei Zuar Association hnenah pek a ni a, January ni 16, 2026 ral hmaa insawn tura hriattirna a ni. Mahse, an insawn ta tlat lo. Thuneitu lamin January ni 23, 2026 khan show cause notice an pe ta hial!!
AMC thuneitu lam hian a pawng atakin ‘insawn chhuak rawh u’ an ti a ni lova, insawn a tul chhan engkim inhrilhfiah vek a ni. Thei zuartute hian hun kha leh chen lo duhsaktu thuneitute thu hi an hnial a, thu an AWIH duh dawn lo a nih chuan, sawrkar leh mipui zahlohna lian tak a ni dawn a. Sawrkar duhsakna an lo dawn tawhte kha thuawihlohnaa an chhang let a nih chuan, ‘lawmna chang hre lo’ tih an hlawh mai dawn a ni.
Thei Zuartute leh Thuawihna….
