Theihna nei thalaite sawrkarin thawhpui a duh – Chief minister

Thalai zingah thiamna leh theihna hlu tak neite chu sawrkarin Bana Kaih policy hmanga thawhpui a duh tih chief minister Lalduhoma chuan a sawi.
Tunhnaia National Skill Competition – Indiaskills 2024 neiha Mizo thalai pariat medal late chu Thawhtanni khan chief minister hian a pisa-ah lawmpuina a buatsaih a. India ram huap skill competition-a medal la thei Mizo thalaite chu a chhuang tih a hrilh. Nakinah mahnia dehchhuah neia hma an lak tak tak dawnah Bana Kaih (hand holding) policy hnuaia thawhpui theih an ni tih a hrilh bawk.
“Mizo thalai zingah thiamna leh theihna hlu tak tak nei an tamin a hriat a, chu’ng mite zawnchhuah chu a pawimawh hle. A thiam leh theite chu sawrkarin Bana Kaih Policy hmanga thawhpui a duh a. ‘Beneficiary’ kan ti ve dawn loa, ‘business partner’ kan ti ang. A thlawna sem lam kalsanin, a hlawhtling ngei turte thawhpui kan tum a ni,” a ti.
Kumin bikah erawh zau takin hma an la thei dawn loa, nakum atang chuan nasa zawka kal theih an tum tih CM hian a sawi a ni.
Labour Employment, Skill Development & Entrepreneurship minister Lalnghinglova Hmar chuan inbuatsaihna hun an ngah lo chungin, lawmman an dawng tha hle tih a sawi a. Kum 2026 intihsiakna atana inpuahchah a phurawm tih sawiin, lawmman latute hi ITI leh Women Polytechnic-a zirchhuak an nih hlawm avangin Mizorama kan institution-te that zia pawh a pholang tih a sawi a ni.
Medal la te hi sawrkarin lawmpuina sumfai (incentive) pek a tum thu sawi a ni a. Lawmman latu zinga pahnih hian international level intihsiaknaa India ram aiawh turin vawiin, May 28 hian Mizoram an chhuahsan ang a, national camp an zawm ang.