Theihtawpa hma ka laknaah
zirna-in ram pumah hma sawn
– Lalchhandama Ralte
Education minister a nih laia zirna tihhmasawnna atan theihtawpa hma a laknaah ram pumah zirna lamah hmasawnna a thleng tih MLA Lalchhandama Ralte chuan a sawi.
Tuivawl bialtu MLA, leader of Opposition Lalchhandama Ralte hian a bial chhung khaw hrang hrang a fang mek a. Khawtlang hruaitute nen an inkawmnaah zirna a ngaihpawimawh thu sawiin, sawrkar term hmasaa Education minister a nih laiin zirna tihhmasawnna atan theihtawpin hma a la a, chu chuan ram pumah zirna lama hmasawnna a thlen a, a bial Tuivawlah pawh zirnain nasa takin hma a sawn bakah hmasawnna tur tam tak la awmah hmalak a duh tih a sawi
Hriselna, inkalpawhna kawng leh khawtlang mamawh tui lakna thlengin a hnianghnar chho zel chu lawmawm a tih thu a sawi a. Hmalakna tur la awmah hma lak a duh tih a sawi bawk.
MNF sawrkar chhunga Zoram kawtchhuah thar ruahmanna a lo siam, sawrkar tharin ruahmanna a kalpui chhunzawm dan a hmunah a en a. Mauchar leh Sakawrdai inkar existing road siamna tur cheng vaibelchhe 14 ruahman tawh chu contractor-in a thawh chhiat em vangin terminate a ni a, contractor thar zawng thuai turin sawrkar a ngen tih a sawi a ni.
Inthlanah party hrang hrang inep thin mah se, mipui aiawh tura thlantlin a ni a, mipui aiawh MLA a ni a, MNF MLA bik a ni lo tih Tuivawl bialtu MLA hian sawiin, tu pawh a lakah inthlahrung lo turin a chah a, ram rawngbawlna kawngah thawhho puiah a sawm tih a sawi a ni.
Theihtawpa hma ka laknaah zirna-in ram pumah hma sawn – Lalchhandama Ralte
