Thenawm ramten tuialhthei an dilna India-in ngaihtuah dawn
Asia khawthlang lama buaina avanga energy-a harsatna awm mek karah Bangladesh, Maldives leh Sri Lanka ramte tuialhthei pe tura a ngenna chu India chuan a ngaihtuah mek niin external affairs ministry-in Ningani khan a sawi.
Energy lama thawhhona hi India chuan a chhehvela ramte nena hmasawnna lama thawhhona a neihna atana lungphum pawimawh takah a hmang mek a. Delhi hian ramri kaltlanga Nepal leh Bangladesh thleng tur pipeline siamna tur sum a thawh ve a, Bhutan-a hydropower sector tihhmasawn nan pawh a pui bawk.
Iran leh US inkara buaina chhuak vangin khawvel puma tuialhthei leh boruakalhthei man a san zel avang leh Strait of Hormuz kaltlanga thlitfim loh phurh a tlem avangin thenawm ram, Bangladesh ang ramte chuan tuialhthei pek belh dil turin India lam an hawi mek a ni.
External affairs ministry thupuangtu, Randhir Jaiswal-a chuan kar tina thuthar lakhawmtute a kawmnaah, “Bangladesh sorkar atangin diesel pe tura ngenna kan dawng a, hei hi enfiah mek a ni,” a ti.
“Ram dang eng emaw zat atangin hetiang ngenna hi kan dawng tawh a, Sri Lanka leh Maldives atangin kan dawng a, hengte hi keimahni mamawh leh awm dan ngaihtuah chungin kan enfiah mek a ni,” a ti bawk.
India ram chu refined petroleum product thawn chhuaktu lian ber a nih thu Jaiswal chuan a sawi a, a bik takin a thenawm ram hrang hrangah a thawn nasa hle tih a sawi a. Bangladesh nena inlaichinnaa ‘mipui lam hawi leh hmasawnna lam hawi’ kalpui mek zingah India hian kum 2007 atang khan Assam-a Numaligarh refinery atangin tuipui, rel kawng leh India-Bangladesh Friendship Pipeline hmangin diesel a pe tan a ni.
“Numaligarh refinery leh Bangladesh Petroleum Corporation inkarah October, 2017 khan sale-purchase agreement ziah a ni a, an inremna angin high-speed diesel thawn thin a ni,” tiin Jaiswal-a chuan a sawi.
Bangladesh-a diesel thawn hi kum 2017 atanga tan kha a ni a, Dhaka-in thawn belh tura a ngenna chungchangah thutlukna siam hunah India-in thlitfim theih zat, ram mamawh leh diesel awm zatte a ngaihtuah dawn tih a sawi bawk.
Thenawm ramten tuialhthei an dilna India-in ngaihtuah dawn
