Site icon The Aizawl Post

Thenfai a ngaih chhan lam…

World Water Day hmalakna kal zelah kar kalta Inrinni khan, Mizoram chhunga kan lui pawimawh ber pakhat Tlawng lui fintu Nghasih lui thenfai hnatlang neiin Lungleia sawrkar department thenkhat leh pawl hrang hrangte an thawkchhuak a. Nghasih lui kam leh a chhehvelah bawlhhlawh chi tin reng a tam thu hrilhfak a ni a. World Water Day denchhena Chite lui thenfai hnatlang neih tum pawh khan, tui dahna plastic um ruakin Chite lui tui a khuh hneh hle a, tui a lang thei mang lo.
Kan bawlhhlawh thehthang dan a dik loh avangin heti hian kum tin lui thenfai hnatlang kan nei a, kan thianfai tluk tluk reng mai chu a ni a. Engvanga thenfai ngai nge a nih tih lamah hian hma kan la na lo va, ‘a bawlhhlawh leh ta’ tiin kan thianfai leh mai thin.
Bawlhhlawh thenfai a ngaih chhan chu tlang hriat a ni, ‘eng vang nge?’ tih a ngai lo, kan hre chiang, tu te pawhin bawlhhlawh a tlinkhawm chhan hi kan hre vek. Thu tha kan inhrilh a, bawlhhlawh thehthang dan dik zawm turin kan inngen a, kan infuih a, kan inhrilh a, awareness lam pawh kan inpe tha malh malh hle. Chuti chung chuan kan lui a bawlhhlawh em em reng a, hnatlangpui hi kan nei reng mai a; kum sawm hma lam atang daih tawh khan lui thenfai hnatlang hi kan lo nei tawh thin.
Hetia lui thianfaia hnatlangpui thawhchhuah a ngaih reng chhan hi chu kawmkar vela a ruka bawlhhlawh thehthang kan la chin vang a ni a; heng bawlhhlawh a ruka thehthangte hi ruahsur hian a rawn khawrh chhuak leh vek thin a, hei hi a phat theih loh. Tuihawkin khaw chhung kawmkar leh tuiluankawra bawlhhlawh inchhek khawlte a len chhuak a, kawrte-ah lutin, lui lian zawkah a len lut leh a, chutiang infawkkhawm chuan kan lui tui hi a tibawlhhlawh ta thin a ni. Chumi awmzia chu, lui tui tibawlhhlawh thintu bawlhhlawhte hi lui a thlen hmaa thenfai hi a finthlak zawk dawn tihna a ni a; chutih rualin, bawlhhlawh thehthang chungchangah hian tun aia khauh zawka dan lekkawh te pawhin awmzia a nei thui hlein a rinawm bawk.

Exit mobile version