Mizoram State Livelihood Mission (MzSRLM) Serchhip RD Block hnuaia Vantawng Cluster Level Federation hmalaknain Thawhlehni khan Thenzawl Hermon Vengah khualzinte tana chaw leh eitur chi hrang hrang, Mizo duhzawng leh khawvel ramdang leh India rama hnam hrang hrang chaw leh eitur siam theihna, Food Court changtlung tak Serchhip District DRDO project director HD Lalpekmawia’n a hawng.
DRDO PD bakah state project coordinator KS-NRO Anirban, Serchhip District DRDO DFS Vanlalmuanpuia, APD Stephen Auhmun, Serchhip Block BMM Zodinsanga, Vantawng CLF CC Vanlalruata Tochhawng leh Thenzawl VC aiawhin Zothani ten thu an sawi a. Mizorama mikhual, khualzinten an tlawh nasat Thenzawla hetianga chaw leh eitur chi hrang, Mizo chauh ni lo, hnamdang duhzawng pawh siamna hmun changtlung tak self help group (SHG) te hmalaknaa buatsaih a ni chu lawmawm an tih thu leh Mizote khualchawn, customer care lamah tan kan lak a tul thu an sawi. Thenzawl Food Court chu mipuiin tangkai taka an hman an duhsak thu an sawi a ni.
Serchhip DRDO project director chuan Food Court dinna atana rilru leh tha leh zung thawhtute chungah lawmthu a sawi a. Tangkai taka Mizoram mipui, zin veivakte leh state dang leh ramdang atanga khualzinte pawhin an hman a beisei tih a sawi. MARY SHG North Vanlaiphai ten sunhlu, Dragon fruit, kawlthei, balhla, theiherawt, serthlum, khawmhma leh lakhuihthei atanga thei tui (beer) leh sunhlu candy an siam bakah Chekawn SHG-in Zopui Lemon Squash an siam chu mipui lei theih turin a tlangzarh nghal bawk.
Vantawng Cluster Level Federation enkawl Food Court-a thawktute hnenah hian MzSRLM Sub-Scheme pakhat SVEP hmalaknain Kereal atanga eisiam zirtirtu chahchhuahten chaw leh eitur chi hrang hrang siam dan an zirtir a. Vantawng Cluster Level Federation hnuaiah hian SHG 179 awmin, member 1200 chuang an awm mek.
Thenzawlah Food Court siam thar
