Serchhip district Thenzawla plastic bawlhhlawh sawngbawlna hmun, Plastic Waste Management Centre din rawtna chu UD&PA department pawmpui turin thehluh a ni dawn.
Serchhip Town Sanitation Task Force chairman, district bawrhsap Paul L Khuma hoa thukhawm chuan Solid Waste Management Bye-Laws 2018 hman chungchang an sawiho a. He dan hi Aizawl leh district khawpui hmun thenkhata hman mek niin, Serchhip district-a hman ve turin kum 2020 khan hma lak tan a ni a, notification pawh tihchhuah a ni tawh.
Tun tum thutkhawmah hian he dan hi Serchhipa hman tan a nih theih nan a thuphunga pawm a ni a. He dan hnuaiah hian bawlhhlawh tawih thei leh thei lo thliarhran dan; chenna in, office, school leh sumdawnna hmuna bawlhhlawh khawnna rate; mipui mimir leh chhungkaw tin mawhphurhna a awm avangin mipuiah zau zawka inzirtir, te sawi leh pawm a ni.
Green Herd SP Pvt. Ltd chuan plastic bawlhhlawh sawngbawlna hmun, Plastic Waste Management Centre Thenzawla an din tur chungchang chu Task Force member-te hmaah an sawifiah a. PHE department nen thawk dunin, plastic bawlhhlawh lakkhawm chu an Centre hian an buaipui dawn a ni. Serchhip khawpuiah village council-te chhawk zangkhai a, sum leh paia mipui phur tihrit belh si loin bawlhhlawh tawih thei lo khawn an inhuam thu leh, bawlhhlawh phur motor-in a thlen phak loh hmunah mihring ruaia an kawtkai atanga bawlhhlawh lakkhawm sak thlenga an inhuam thu an sawi.
Town Sanitation Task Force chuan an rawtna hi tha tiin, UD&PA department nen sawiho se, thawhho theih dan kawng a awm em tih zirchiang se, tiin an rel.
Thenzawlah plastic sawngbawlna
