BY Dr Keihawla Sailo
He thu hi Pu K Lalhmingliana vahvaihpui thin kha a nih mek laiin, kei chuan thiam thu ka’n sawi leh teh mauh mai dawn a nih hi!
Sorkar hnathawkte hlawh a sang ta viau mai hi chu, Congress leh MNF tihsual lian tak a ni.
Congress-in sorkarna an chelh lai khan PWD Chief Engineer hmasa ber Pu Robula pay scale chu Rs 5900 a ni a, Chief Engineer, PHE pay scale erawh Rs 5100 a ni a, Chief Engineer, Electric pawh Rs 5100 a ni a. An hnua Chief Engineer pay scale apiang chu Department dangtea Head-te theuh pay scale ang tho Rs 4500 ni ve tawh turin zu ti mauh mai peka maw le!
Chuti taka pay scale an lo kalpui dan chu siam dik turin 5th Pay atang chuan siam that dan ngaihtuah turin pay committee siam a ni a, tah chuan a Secretary atan kei min ruat a, a chairman atan Pu Haukhuma Hauzel, Finance Secretary chu ruat a ni a.
Chutih laia Department dang dangte pay scale pawh chu a chiri nuaih mai a, Assam Sorkar hnuaia kan awm laia hlawh la mek te, UT Sorkar hnuaia pay scale nei te leh Mizoram State hnuaia pay scale te chu a chiri nuaih mai a. Chung chu siam tha vek tura Pay Committee chu siam a ni a.
Supreme Court-a Ukil pakhatin thurawn min pek angin, Pay Scale zawng zawng siam that vek tura chu pay committee thar chu din a ni. Chu Ukil chuan, “In pay scale siam thar chu a zawm duh lo apiangin 4th pay scale hlui an hmang mai tur a ni. Supreme Court Ruling chuan, ‘Hlawh reng rengah pay committee/commission recommend-na anga siam a nih phawt chuan chu ngei chu hman tur a ni ang a, Court pawh a inrawlh thei lovang, dik lo taka tih a nih loh chuan’, a tih avangin 5th pay hman dan tura committee emaw pay commission-in a siam ang ang chu a lal ber ang. Court-ah khing pawh nise thiam an chang thei ngai lovang”, a ti hmiah mai a. Supreme Court ukil thurawn min pek dungzui chuan Pu Haukhuma ho chuan recommend-a uluk takin kan siam a. Kan ngaihtuah uluk hle a, Krismas ni leh Kum thar nite pawh chawl lo khawpin kan committee thin a. Kum khat lai uluk taka committee a, kan recommend-te chu siam a, buatsaih kan ni a.
Kan recommendation chu Sorkar pawmtir turin kan theh lut ta a. Pu Lal Thanhawla Cabinet chuan passed ta mai lovin, ennawn leh turin min ti a. Chutah zet chuan kan committee Chairman, Pu Haukhuma chuan, “Kei hi ka buai em a, mi dang Chairman ve tawh se la”, a ti ta hmiah mai a. Tichuan midang, Pu Vanhela IAS chu a aiah an dah a. Ani, mi thar chuan a zir ve phawt loh chuan a ngaihna a hre si lova.
Tichuan, MLA election a lo awm ta mai a, MNF an lo lal ta a, MNF lo lal chuan, keini ho recommendation siam pawh chu hre ve mang hlei lovin leh Finance Department pawh chu biakrawn nachang hre ta lem lo chuan, a Cabinet chuan 5th Pay central-in a siam ang ang chu hmang zui ve nghal turin an passed ve tawp mai a. Chumi hunah chuan Finance Department Secretary Pu Lalchhuma a lo awm thar a. Ani chu Assam Sorkar pawha Accountant General lo ni tawh thin a ni a. Ani tal pawh chu berawn map lova MNF Ministry thar chuan 5th Pay Scale thar chu an passed ta mai mai si a nih chu.
Dr Zokhuma min hrilh dan chuan, “Pu Lalchhuma kan inah a lo leng a, Varanda-ah a vei vut vut mai a’, 5th pay hman dan tur notification an chhuah hma chu ka office dawn lo’ ”, a ti bur mai a nih chu.
Thil awmzia hre mang hlei lova, Revenue Department-a Surveyor Branch lama officer pakhat chuan an hlawh hniam tak nachhanah min puh zui ta zel mai leh nghal a.
Hengte hi ‘a hretuin’ chanchinbua ka ziak loh chuan fel dawnin ka hre lova. Hreh tak chungin he Article hi ka ziak ta a ni e.
Ngaihtuah peihtute tana hriat atana pawimawh chu, Police leh Police office-a thawkte chuan kum khat chhungin thla 13 hlawh an la leh Sorkar hnuaia Nurse-ten thla 13 hlawh an la bik hi a ni. Private Hospital-a Nurse-te hian thla 13 hlawh kum khatah la ve se a awm em??
10th Pay/Finance Commission of India chuan, “Tripura, Himachal Pradesh leh Mizoram te hian, an Pay Budget-ah pawisa an dah tam lutuk, development lamah dah tam fe zawk rawh se”, a ti a. Chutih lai chuan Mizoram Pay Head chu 34% a ni a. Tunah phei chuan 80% vel lai a ni ta nghe nghe a nih chu.