Sawrkar laipui Ministry of Home Affairs-in mi huaisen, midangte nun chhan nana mahni nunna thapa che chhuakte chawimawina, Jeevan Raksha Padak Award (posthomus) dawng tura a thlan, Anthony Lalhruaizela, Mamit district hnenah Ningani khan chawimawina hlan a ni.
Mamit district bawrhsap VL Remliana chuan Anthony Lalhruaizela chanchin a chhiar a. A chhungte hnenah Jeevan Raksha Padak Award certificate leh medal a hlan a ni.
Huaisen chawimawina dawngtu Anthony Lalhruaizela (23) s/o Vanlalzapi, Pukzing Mamit district hi Indian Army-ah lutin Assam Regiment-ah a thih thleng hian a awm a ni.
2021 December 7 khan a awmna Kanpur atanga chawlh la in Aizawl Dawrpui Vengthara a chhungte hnenah a thleng a. December 13-ah a thiante nen Tlawng bul, Azuali Falls-ah an kal a, a thianpa chu Tlawng tui khauhin a tui hleuh chu a la tih a hriatin Anthony Lalhruaizela hian a thianpa chhan tumin tuiah a lut a. A thianpa nunna chhan tuma a beih laiin Tlawng tui khauh hian la ve in a nunna a chan ta a ni.
Jeevan Raksha Padak hian medal, certificate leh cheng nuai 1 a kengtel a. Sumfai hi Home ministry hian a dawngtu turte hnenah a pe tawh a ni.
Thiante nunna chhan tumnaa nunna chan chawimawina hlan
