Thihchilha Pakistan mosque beihnaah mi 31 thi

Thihchilha Pakistan mosque beihnaah mi 31 thi
Pakistan-a buaina a tamna lai, hmarthlanga thihchilh bomb hmanga mosque beihna leh silaia inbeihna thleng zuiah civil mi paruk leh police officer 15 telin mi 31 an thi a, mi eng emaw zatin hliam an tuar bawk.
Zirtawpnia tawngtai hun pangngaia kal khawm an tam lai, chhun dar 01:15 (India-a chhun dar 01:45) velah puak thei phur car-in Kohat-a police headquarters-a mosque luhna chu a su a, a puak zui ta a. Khawpui hi Afghan nena an inrina bul province, Khyber Pakhtunkhwa-a awm a ni.
Pakistan Taliban tia hriat mai thin, Tehrik-e-Taliban Pakistan (TTP) chuan tihah an chhal a. Ittehadul Mujahideen (Mujahideen tangrual pawl), Taliban commander Hafiz Gul Bahadur-a chuan thihchilh hmanga an beihna a nih thu a sawi.
Province police chief Zulfikar Hameed-a chuan thihchilha beihna ngei a nih thu a sawi a. A puah hnuah hian silai kengten police compound luh an tum zui a, officer-te nen an inkap zui tih a sawi bawk.
Hliam hi an vaiin mi 75 vel nia sawi a ni a. Chhanchhuah hna thawhnaa hotu, Bilal Faizi-a chuan hliam tak zawk hi tawngtaia awmte niin a sawi tih The Associated Press-in a tar lang.
Mosque hi a chhe nasa hle a, police station pawn lam bang pawh a tlu a. Mi chengte chuan a puak ri hi hla tak atang pawhin an hria tih an sawi hlawm.
Al Jazeera chuan inbeih zuinaah hian a beitu mi paruk vel thah an ni tih a tar lang a. Pakistan chuan Afghan Taliban-te chu an ram chhung atanga pawi khawih thei turin TTP leh pawl dangte a khawi ngam niin an sawi a, Kabul chuan a pha thung tih a tar lang bawk.
TTP hi pawl hrang ni mah se kum 2021 atanga Afghanistan-a rorelna fawng chelh lehtu Taliban nen an inzawm a ni.
“Kohat hi Afghan ramri bul lawk a ni a, buaina tamna, North Waziristan region luhna pui ber niin Bannu leh Dera Ismail Khan panna a ni bawk a. Tun hnai thla tam vak lo liam ta chhung khan heng lai hmunah hian beihna lian tak tak a thleng fo a ni,” tiin Al Jazeera hian a tar lang a ni.