Dinhmun ngelnghet zawka sawrkarin an khaw school hlangkai tura phutna kal mekah heng school awmna khua tlawmngai pawl leh, khaw thenkhatah chuan political party ten hma an lakpui tan a, sawrkar nawr chhunzawm zel an rel.Khawtlangin an khaw mamawhna avanga higher secondary school an din, kum 2008-a sawrkarin lumpsum aided dinhmuna a dah te chuan, dinhmun tha leh deuh zawk – adhoc aided-a dah an phutna kal zelah heng school ho intelkhawmna, Mizoram Govt Lumpsum Aided Higher Secondary School (MIGLAHSSA) chuan August 28 khan school kal thoa zirlai zir lohin an thil phut nawrna bul an tan a; an lo ruahman lawk tawh angin August 29 atang khan school an khar tan a ni. September 1 kha a ni 4-na a ni a, sawrkar atangin thu dawn thar an nei lo niin MIGLAHSSA chuan The Aizawl Post zawhna an chhang.
Kum 2008-a lumpsum aided-a hlankai hi school 9 – Thingsulthliah HSS, Farkawn HSS, Zobawk HSS, Zawlnuam HSS, West Phaileng HSS, E. Lungdar HSS, NE Khawdungsei HSS, Phullen HSS leh Tuisualral HSS niin, thuthar engmah hriat tur an la neih loh avang hian heng khuaa NGO leh political party chuan hma an lakpui tan a. Phullen Joint Action Committee (JAC) chuan resolution pass in, kum 20 chhung tehmeuh khawtlangin harsa taka alo enkhawl hram hram Phullen HSS chu sawrkarin chhawk ve thuai tur te; kum 2008-a GIA (grant in aid) Lumpsum HSS leh 2018-a GIA te chu sawrkarin hrutrual lo turte; sawrkarna chelh mektuten an tiam tawh angin tuna an hun chhung ngeia adhoc GIA pe tur leh, sawrkarin a lo tiam tawh anga an school hi adhoc status-a hlankai a nih loh chuan school khar chhunzawm leh a tul dan zela hma lak chhunzawm a ni tur thu te a ni.
Thingsulthliah NGO & political party hrang hrang chuan Thingsulthliah HSS chu tuna sawrkarna chelhtuten 2018 MLA inthlan dawna an lo tiam tawh angin, an term chhung ngeia adhoc GIA-a a hlan an phut tlat tih an sawi a. Kum 20 chhung khawtlangin an lo hahpui tawh chu an sawi anga phurh chhawk ve tawh turin an ngen nawn tih sawiin, MIGLAHSSA-in school upgrade tura hma an lakna chu an khawtlangin a thlawp tih an sawi.
NE Khawdungsei JAC pawhin kum 2003-a din NE Khawdungsei HSS chu 2008 July 17-ah lumpsum aided-a hlankai a nih thu te, kum 2018-a chief minister Pu Zoramthanga intiamna anga dinhmun tha zawk, adhoc aided-a hlankai a nih ngei theih nan JAC chuan theihtawpin hma a lak zel dawn thu leh, MIGHAHSSA hnuaia ruahmante a hlawhtlin theih nan an thlawp zel tur thu te an sawi.
Hetianga khawtlangin hma an lakpui hi tunkar chhungin khaw tinah hian neih theih tum a ni tih thudawnna chuan sawiin, an hman hun a inan vek theih loh avangin ni khat thilthuaa a ruala thuchhuak nei thei an ni lo tih a sawi a ni.
Thil phut neia sikul kharna khua NGO-ten hma la tan
