Thil phut tih hlawhtlin dan dap
dawn vangin lungawiloh titawp
CSS thawktute thil phut chu sawrkarin tih hlawhtlin dan dappui a tum avangin lungawiloh lantir chhunzawm zel an tum chu an tawpsan rih.
All Mizoram CSS Employees Coordination Committee (AMCECC) chuan, sawrkar laka lungawilohna an lantir mekah DP&AR minister Pu K Sapdanga, adviser to
CM (Political) Lalmuanpuia Punte, chief secretary charge la mektu Pu H Lalengmawia leh DP&AR hotute nen an thil phut hrang hrang an sawiho a, tih hlawhtlin dan kawng dappui an tum avangin, April 21-23 chhung mass casual leave laka lungawiloh lantir an tum pawh kalpui tul rih loah an ngai a, thulh rih a ni tih a sawi.
Sawrkarin an lungawi tawkna ruahmanna tha tak a siamsak zel an beisei rualin, sawrkar hmalakna a vuaicha viau a nih chuan awm zel dan tur chu AMCECC Executive Committee-in a rel leh dawn tih a sawi bawk.
Lungawiloh an lantir chhunzawm loh chhan tur chu – DP&AR minister hoa an sawi, initial appointment (Ref – Regularisation of CSS Scheme 2024 point no 4 sub no(a) Same post under the same scheme) chu service seniority chhiarna atan hman theih a nih tur thu an dawn avangin; DPC chungchangah CSS scheme-in a phut ang taka CSS concerned department-in proper recruitment process anga lak chu pawm theih a nih thu DP&AR hotute atanga an dawn avangin; corresponding post chungchangah DP&AR minister chuan representation thehlut tura a tih ang leh a tul anga bawhzui sak zel a inhuam avangin a ni.
Adviser to CM (Political) hian pen/ tool down strike an neih avangin sawrkarin dan hmanga ‘no work no pay’ order a siam chu sut leh turin chak taka hma lak a tum tih AMCECC hian an sawi bawk.
Thil phut tih hlawhtlin dan dap dawn vangin lungawiloh titawp
