Sawrkar thuchhuahin a tarlan danin, AMC-in thupek a lo chhuah tawh angin, Mizoram Legislative Assembly, Dak Inpui, FCS & CA Office, Agriculture Office, Horticulture Office leh Tennis Court chhehvel kawng kamah thil zawrh phal a ni tawh lo a. Zirtawpni leh Inrinnia kawng kama thu thinte pawh AMC Multi-Complex Building, Tuikual South-ah insawn vek tawh tur, tih a ni a.
Kan hriat angin tunhnaia kangmei avanga Treasury bazara thu thinte chu AMC Multi Complex, Tuikual South-a insawn tura tih an ni a. AMC Multi Complex hi, treasury bazar-a thu thinte leh helai chhehvel kawngkama thil zuarte insuan luhna tura duan a ni a, Cheng vaibelchhe 10.59 senga 2017 atanga sak tan, July ni 6, 2023-a hawn tak kha a ni. Hawn a nih atanga kum hnih dawnah pawh he multi complex hi a la ruak hiai huai reng a, tunah hian thil thleng (incident) denchhenin khauh deuh zawkin helaia insuan lut tur hian thuneituten thupek an chhuah mek a ni a.
India sawrkar hian dinhmun harsa zawkte eizawnna hi a ngaih pawimawh em avangin khawlai kawtthlera eizawng street vendor-te humhalhna dan “The Street Vendors (Protection of Livelihood and Regulation of Street Vending) Act, 2014 a lo siam tawh a. He dan hmang hian Mizoram pawhin ‘The Mizoram Street Vendors (Protection of Livelihood and Regulation of Street Vending) (Amendment) Rules, 2021 a nei mek bawk a.
Aizawl khawpui chhungah pawh hian identified street vendors hi kum hnih khat kaltaa record ang chuan mi 2000 dawn an awm a, tun dinhmunah hian hei ai hian an tam zawk tawh ngeiin a rinawm. Heng zinga mi engemawzat hi chu tuna inzawrh khap takna hmuna thu mekte pawh an ni awm e.
Heng identified street vendor-te hian thuthmun bik an neih theih tak avang hian PM-SVANidhi scheme hnuaiah loan te la chungin ei an zawng a, loan an rulh theihna tur hian an inzawrhna hmun (location) hian kawngro a su em em a ni. Tuna AMC Multi Complex chhunga lut khawm vek tura tih ngawt pawh hi, awmze nei deuh zawka enfel theih chu nise a duhawm khawp ang le.
Thil zawrh khap chungchang
