Thingdawlah alu chi siamna bun
Thingdawl Agriculture Farm-a bun, lei (soil) telloa alu chi thar chhuahna (Aeroponic System of Potato Seed Production) chu Ningani khan Agriculture and Farmers Welfare minister PC Vanlalruata’n a hawng.
Department hotute sawi danin, Aeroponic System of Potato Seed Production Project hi North Eastern Council atanga 100% funding a ni a. Mizoramah alu chin hun season-ah ching thin mah se, a chi dahthatna an neih that tawk loh avangin a chingtute tan chi mamawh ang tawk a awm thin loa, awlsam leh indaihzai zawka alu chi tha an neih theihnana ruahman a ni.
NEC atang hian production unit atan cheng nuai 198 sanction a ni a. Project hna thawktu hi Blue Stallion Equipment (P) Ltd. Ludhiana a ni. Thingdawla Aeroponic system hmang hian kum khatah season khatah alu chi (mini tuber) nuai 2.5 thar theih beisei a ni. Kum khata season hnih an kalpui thei a nih chuan chi (mini tuber) nuai 5 tharchhuak thei tura beisei a ni.
Aeroponic system-ah hian alu (plant) chu tissue culture laboratory-a daha sawngbawl a nih hnu in, Aeroponic Production Unit ah lak a ni anga, alu chi tiakin a zung a siam chu lei si loin an khai thin. A zung an khai chu lei (soil) hmang loin tui leh alu in a mamawh tur chaw tha khawl hmangin an phuh (spray) thin a ni. Hetiang hmanga alu thar hi a hrisel duhin hmun leh lei renchemnan a tha, tih a ni.
Minister chuan alu chi tha an thar thei zel a nih chuan alu chingtuten a chi tha an indaih lohna a phuhruk dawn a. Khawl leh hmunhma peihfel mah se, enkawl that loh chuan tum angin hlawhtlinna an hmu dawn loa, thawktuten an vei a ngai tih a sawi a ni.
Thingdawlah alu chi siamna bun
