Thingtlang mite tihhmasawnna
tur sawihona NABARD-in siam
NABARD chuan an sum hmanga thingtlang mite dawmkanna tur leh eizawnna ngelnghet an neih theihna atana tih tur hmachhawp awm thei chungchang sawihona chu February 14 khan Aizawlah a buatsaih.
NABARD siam State Focus Paper 2025- 2026 tlangzarha sawihona hmanpuitu chief minister Lalduhoma chuan, State Focus Paper tihchhuaha Mizorama agriculture leh thingtlang lama hmasawnna chak taka kalpui zelna atan ngaihtuahna thar, rawtna leh tih tur pawimawh tarlante a hlawhtlin ngei a beisei tih a sawi a. Kum tam tak chhunga NABARD hmalakna chu thingtlang infrastructure tihhmasawn kawnga tanpuina, micro enterprise tihhmasawn, mi hnuaihnung zawkte tana sum leh pai lama tihhmasawn emaw hmasawnna programme kalpui, thingtlanga khawtlang nunah inthlak danglamna thlentu a ni tih a sawi. NABARD chu loneitute chu agriculture technology thar hmang tangkaina kawngah, an thil thar leh siam chhuah zawrchhawn kawngah, thingtlang lama nunphung a tha zawnga tidanglama tihchangtlunna kawngah thawktu pawimawh tak a ni tih a sawi bawk.
NABARD Mizoram Regional office general manager Pankaja Borah chuan district tin tana PLP (Potential Linked Credit Plan) an siam chu State Focus Paper-ah dahkhawmin, hei hian state-in a mamawh zat loan a lak theih zawng zawng a tarlang tih a sawi a. Department hrang hrang leh bank-te chu thingtlang tihhmasawnna atan, eizawnna siamna atan leh loneitute sum lakluh tihchangtlunnan sector hrang hrang hnena an mamawh loan pe tura lungrual taka thawk turin a ngen. NABARD hmalakna hrang hrang – refinance, rural infrastructure, financial inclusion, farm and off-farm sector, development of cooperatives lama hmalakna a sawi bawk.
Hmanpuitu dang Rural Development minister Prof Lalnilawma chuan, thingtlang thalaite thiamna tihhmasawn, value chain tihhmasawn leh agro-based processing ang chi hmasawnna kawng hrang hrang hmanga food processing sector tihchangtlun a tul tih a sawi a. State-in cold storage, agriculture marketing infrastructure godown, warehouse adt. a tlakchham avangin food processing leh value addition tih a harsa a, an mamawh hria a, an harsatna sukiang turin bank-ten an mamawhna zawnah pui thin turin a ngen a ni.
Seminar-ah hian agriculture kaihhnawih hrang hrang sawiho a ni a. State Focus Paper 2025-26 hian sector hrang hrang hnuaia hmalak theihna awm – agriculture & allied sectors-ah vaibelchhe 964.45, micro small & medium enterprise-ah vbch. 1471.23, other priority sector-ah vbch. 548.90 a dah a, a vaia belhkhawm chu vbch. 2984.59 a ni. Heng bakah hian bank-ten kum 2025-26 chhunga annual credit plan an siam rualin thil dang hmalak theihna a awm chuan an telh belh ang.
Agriculture minister PC Vanlalruata chuan NABARD leh banking sector-ten state chhunga agriculture development leh financial inclusion kawnga an thawhnaah lawmthu a sawi a. Grassroot institution hrang hrang – PACS, MPACS, FPO adt. tihhmasawn leh tihchak kawnga NABARD hmalakna fakawm a tih thu a sawi. NABARD-in a sanction tawh rural infrastructure project-te chu chak leh rang taka kalpui a nih theihnan hma an la tih a sawi a ni.
Seminar-ah hian bankers bakah a kaihhnawih sawrkar department leh an hnuai ami – Agriculture, Horticulture, Industries, PWD, P&E, cooperative agencies, MzSRLM leh NGO te an tel.
Thingtlang mite tihhmasawnna tur sawihona NABARD-in siam
