Gopikrishnan Kesavan, kum 27, chuan ‘K2K’ road an ti mai, India hmar lam Kashmir atanga chhimtawp Kanyakumari thleng, km 3,641 chu thirsakawrin ni 13 chhungin a tlan thleng hman a, hetiang tirang thei ber record a siam.
Gopikrishnan Kesavan hian a zinkawngah amah puitu, support team pawh a nei chuang lova, hei vang hian a ei leh in tur leh a thil mamawh dang zawng zawng pawhin amahin a inngaihtuah chawp vek a ni. A zinkawngah hian kawngkam dawr velah te chaw a ei mai thin a, riahna tur room a hmuh loh chang te a awm a, chutiangah chuan kawngkam thingpui dawrah te pawh a riak ve mai thin a ni.
A zinkawngah sik leh sa inang lo tak tak a paltlang nual a, boruak vawt vin tak te, khawlum em em te, hmun khawro em em te a paltlang a, Punjab, New Delhi, Uttar Pradesh, Nagpur, Hyderabad leh a khawchhuahna state Tamil Nadu te paw a paltlang a, Gopi chuan, “K2K ride-ah hian history a hmunpui pawimawh tak tak leh khawpui lian tak tak kan paltlang a, hei hi rider tan a ropui danglam thin a ni,” a ti.
Gopi chuan chaw ei tur zawn chu thil buaithlak pakhat a tling niin a sawi a, chutihrualin hmarlam boruak vawt vur mai leh chhim lama khaw lum lutuk paltlang te pawh zinkawng tiharsatu pakhat a nih thu a sawi bawk.
Thirsakawra Kashmir atanga Kanyakumari tlan thleng rang record siam
