Thla 10 chhunga HIV kai thar 1700
MLA-ten ART la tan sum thawh tum
2024 April atanga 2025 January inkar khan Mizoramah HIV kai hmuhchhuah thar 1769 an awm a, heng zinga zaa 67 hi inpawlna (sex) atanga kai an ni. MLA-te chuan ART latute tan sum an thawhkhawm an rel.
State dan siamtu (legislator) ten HIV/AIDS lama hma an lakna tur committee sang, Mizoram Legislative Forum on AIDS chu Thawhtanni khan an thukhawm a. Kaihruaitu Health minister Lalrinpuii chuan HIV chungchanga Mizoram dinhmun chu mipui nawlpuiin kan vei a tul tawh tih sawiin, “Legislator-te pawhin tun aia nasaa hma kan lak a pawimawh tawh. India rama HIV hluar dan (prevalence rate) chu 0.2% a nih laiin, a sang ber nihna hauh mektu Mizoramah chuan 2.73% a ni,” a ti.
MSACS project director Dr Jane R Ralte chuan Mizoram HIV dinhmun a sawi a. January 2025 thleng HIV kai 32287 hmuh chhuah an ni tawh a. He natna avanga thi hi hriat theih chinah 5511 an tling tawh. 2024 April leh 2025 January chhungin HIV 1769 hmuhchhuah an ni tawh a ni.
Nikum April leh kumin January inkara HIV kai thar hmuhchhuah zat atanga za zela 67 chu invenna tel loa sex hman atangin a ni a, hriau thlianghlim lo inhmantawm atanga kai hi zaa 30.44 an ni.
Mizoram chu HIV natna avanga hun engemaw chen a thalo zawngin langsar mah se, tunhnaiah hmasawnna hmuh tur a awm ve zel a, natna hrik kai thar an tlak hniam bakah he natna avanga thi nasa takin an tlem tawh tih MSACS project director hian a sawi.
Health minister hoa MLA leh MSACS aiawh inkawmnaah hian mahni inringhlelte tan thisen test thuai a pawimawh thu leh hrisel tha pangngai taka awmna atan ART damdawi ei uluk a tul thu sawi a ni a. HIV darh zel tur ven kawnga pawimawh tak Drop-in-Centre mumal taka hman tangkai leh theih dan tur rawtna siam a ni.
MLA-te hian HIV darh zel tur dona kawnga tha thawh an inhuam tih an sawi a. Kum 2024- 2025 chhungin HIV hrik kaiten chatlak loa ART damdawi an lak theihnan, ART panna tur sensoah MLA fund atangin cheng sing 5 theuh MSACS hnena hlan an remti.
Thla 10 chhunga HIV kai thar 1700 MLA-ten ART la tan sum thawh tum
