Thla 10 chhung velin Mizoramah ri hriatna lam tha lo, benga harsatna nei mi sang thum chuang hmuhchhuah thar an ni.
Ningani khan National Health Mission hnuaia programme pawimawh, National Programme for Prevention & Control Deafness (NPPCD) chuan beng lama harsatna tawh lohna atana hriat tur tul inhrilhhriat ni – ‘World Hearing Day’ an hmang a. Heta report danin, NPPCD hi India ramah kum 2006 atanga tan a ni a, Mizoramah erawh kum 2014 atanga tanin, district thar pathum tih lohah chuan he programme hi kalpui a ni a. District thar pathumah pawh kalpui thuai tum a ni. 2022 April – 2023 January inkar khan beng lama harsatna nei mi 21036 inentir zingah beng hriatna tha lo 3625 hmuh chhuah an ni.
He hun hmanpuitu Persons with Disabilities commisioner Vanlaldiki Sailo sawi danin, Mizoramah sawrkarin rualbanlohnaa a chhiar chi 21 a awm a. Cencus hnuhnung berah district thar pathum tih loh Mizorama district 11-ah rualbanlo mi 13415 an awm a. Heng zinga 3600 chuang chu beng ri hriatna tha lo leh tawng lama harsatna nei an ni.
“An tana malsawmna ni tur leh inthliarhranna awm loa harsatna tawk mekten kan kiangah thlamuanga hun an hman theihna’n mawhphurhna kan nei a ni,” tiin, ri hriatna lama harsatna tawkte chang ni lo, rualbanlohna dang neite thlenga dawmkangtu ni turin mitinte theihtawp chhuah puiah a sawm tih a sawi.
World Hearing Day hmannaah hian SCERT, Social Welfare, NILD-NERC, Ephata Society bakah Redeem Garden Special School te an tel a. Kalkhawmte zingah ri hriatna tha lo engemawzat an awm avangin heng mite hian Indian Sign Language diploma C Lalchhuanawmi’n sign language hmangin tawng a lehlin sak a ni.
Thla 10 chhungin beng ri hriatna lam tha lo 3000 chuang hmuchhuak
![](https://theaizawlpost.org/wp-content/uploads/tap_logo-min-large.jpg)