Thla 10 chhungin zu leh ruihhlo kaih
hnawihah END-in mi 6200 an man
Kumin thla 10 kalta chhung khan Excise & Narcotics Department chuan zu leh ruihhloa inhnamhnawih mi 6200 an man tling.
Zirtawpni khan Excise & Narcotics commissioner Z Lalhmangaiha kaihhruaiin district office hrang hranga assistant commissioner leh officer -in- charge hoten kumin January atanga October inkara zu leh ruihhlo beihnaa department-in dan phal loh thil leh dan bawhchhetu a man dan leh hmalakna hrang hrang an thlirho.
Krismas leh kumthar lo thleng turah Mizoram mipuiin him tak leh thlamuang taka hun an hman theihna’n Mizoram hmun hrang hranga zu leh ruihhlo khuahkhirhnaa hmalak dan tur rualkhai tak (standard operating procedure) duangin khauh zawka hma lak an rel.
Thutkhawma tarlan danin, kumin January – October inkar khan heroin kg. 39.018, methamphetamine kg. 122.435, ganja kg. 561.725 leh ruihna atana hman damdawi tui leh mum engemawzat an man. Rakzu litre 56207.095, zu bilh lai tin 10082, a senchi (IMFL) um puitling 13687, a chanve um 4240 leh a quar (180ml) um 8020, Burma zu (BEDC) litre 3271.340 bakah beer engemawzat an man. Hemi kaihhnawihah dan bawhchhia mi 6200 man an ni.
Thla 10 chhungin zu leh ruihhlo kaih hnawihah END-in mi 6200 an man
