Thla 8 chhungin mi 4680-in Synod Counselling Centre pan

Mizoram Synod-in hmun 9-ah Counselling Centre a nei a, kumin chhungin mi 4680-in an pan tawh.
Mizoram Synod Family Guidance & Counselling Centre (FG&CC) in August 18 – 25 chhunga Church Leaders’ Pastoral Care & Counselling Training vawi 37-na a buatsaiha ‘Final Evaluation & Graduation Service’ neih kharnaa report danin, Synod-in Counselling Centre pakua – Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah a nei a. Heng Counselling Centre pakuaah hian kumin August 17 thlenga pantu (client) an neih tawh zat chu 56693 a ni a, kumin bikah mi 4680 an nei.
FG&CC hian pastor leh kohhrana hruaitu (church leader) te pualin counselling training buatsaih thin a ni a. Pastor-te pual hian kum 1992 atang khan buatsaih thinin, pastor 535 training chhuak an awm tawh a. Church leader-te pualin kum 2002 atang khan vawi 37 buatsaih tawhin mi 838 training chhuak an awm tawh a ni.
Tun tuma counselling training-ah hian Aizawl khawpui chhunga Pastor bial 9 atangin kohhran aiawh mi 27 an tel a. Kharna inkhawm hmanpuitu Synod executive secretary i/c FG&CC Rev VL Luaia Hranleh chuan kan ramah sualna hrang hrang a tam ta hle a, mimal nun chauh niloin, chhungtin leh kohhran thlengin a nghawng tih a sawi a. Hei vang hian kohhran mite harsatna tawh hi kan vei a ngai takzet tawh tih a sawi a ni.