Thla 9 chhungin ruihhlo
vangin counselling pek 696
Central YMA hnuaia ruihhlo dotu pawl Central Anti Drugs Squad (CADS) chuan kumin thla 8 chhungin ruihhlo kaihhnawiha an man mi 696 chu counselling an pe.
Central YMA hian Mizoram Synod Social Front thawhpuiin ruihtheih thil avanga an mante Pathian thu leh nun kawng dik zawh kawnga an mamawh hrilha zirtir turin counsellor pek an ni.
Kuminah January atanga August thleng khan CADS-in ruihhlo kaihhnawiha an man, mipa 541 leh hmeichhia 155, an vaiin mi 696 hnenah counselling an pe a. A tam zawk hi heroin vanga man niin, 696 atang hian 519 an ni. Zu vanga man 44 an awm a, a bak hi ganja leh ruihtheihthil dang vang an ni. An zingah hian ruihhlo ti lo, a zuartu an man 77 an awm bawk.
Kum 2024 July atanga November chhung khan ruihtheih thil avangin CADS hian mi 367 an man bawk a, mipa 268 leh hmeichhia 99 an ni. Heng zinga 173 hi heroin kaihhnawiha man an ni a, ruihhlo ti lo, a zuartu chauh ni mi 65 an awm a ni.
Heng an mante hi an lawina kohhran (denomination) pawh chhinchhiah zel an ni a, Mizorama kohhran zinga member ngah ber Presbyterian kohhran chu a tam ber an ni a, a dawttu pawh member ngah dang Mizoram Baptist Kohhran leh Salvation Army-a lawi an ni.
Thla 9 chhungin ruihhlo vangin counselling pek 696
