Thla bi chhiar vangin England women team-in kekawrbul rawng an thlak
Hmeichhe thlatin thi neih (period) leh thawmhnaw var inbel hian inhmehlohna a nei a, thawmhnaw var lam vek inbelna nikum Wimbledon tennis cham-pionships lamah pawh he buaina hian sawi a lo hlawh tawh a, hei vang hian England rama an football thuneitu sang ber Football Asso-ciation (FA) chuan Thawhtanni khan thuchhuah siamin, England women’s team-in kekawrbul var an hak thin chu a pawla thlak a nih thu an puang.
FA lam hian an hmeichhe team kekawrbul rawng an thlak chhan hi tarlang chiah lo mah se nikum lam daih tawh khan England forward Beth Mead chuan an team-in thawmhnaw thuitu (official kit manufacturer) Nike hnenah an kawkawrbul var thlak chungchang an sawipui thu a lo sawichhuak tawh a, a chhan pawh kekawrbul var leh period lai a inrem loh vang niin a sawi a, hei chiah hi FA lamin an hmeichhiate kekawrbul rawng an thlak chhan hi ni tura ngaih ngheh a ni.
European champions England hian tunthla friendly match-a Brazil leh Australia an infiampui huna home leh away kits an hak hunah kekawrbul pawl ve ve an lekchhuak dawn a, kumin July ni 20 atanga August ni 20 chhunga Australia leh New Zealand ram inthlentawm tur Women’s World Cup-ah pawh kekawrbul pawl bawk an ha zui leh dawn a ni.
Manchester City leh West Bromwich Albion women’s team ve ve pawhin an kekawrbul rawng thlak fel tawhin, City nulate hian a pawlduk (navy blue) rawng hain, West Brom lam hian a sen buang lam rawng (burgundy shorts) an ha thung.
Thla hmasa mai khan Ireland women’s rugby team pawhin an kekawrbul rawng chu navy blue-a an thlak thu an puang ve bawk.
Tarlan tawh angin, nikum Wimbledon tennis championships atang khan hmeichhe infiammite tana kekawr leh pawnfen rawng var lam inbel fuh tawk lohna hian sawi zui a hlawh zual a, an period laia kekawrbul leh pawnfen var lam inbel chu harsatna thlentuah ngaiin, game-ah rilru an pe tawk thei lo tih ngaihdan a awm a; hetih lai hian Londoan khuaa khelh mi grasscourt Grand Slam hi khauh taka thawm-hnaw var inbel kalpuina hmun (strict all-white dress code nei) niin, kumin tournament atangin an inthlahdul ve ta hret a, hmeichhe player-te chu pawnfen hnuaia kekawrbul/kekawrte rawng thim lam (dark coloured undershorts) hak an phal ve ta hram a ni.
Thla bi chhiar vangin England women team-in kekawrbul rawng an thlak
