Thla hnih chhungin meth man hnem

Ruihhlo hlauhawm meth lakah Mizoram a him tia
sawi thin a ni a, man tur hi chu a awm ve deuh reng. Tun hnaiah man tur a pung a nih hmel.
Meth tia sawi methamphetamine hi Mizoramah ti thin an awm lo nia ngaih a ni a, mahse Mizoram hi he ruihhlo lakna kawng a ni. A kawng lian leh pawimawh chu a ni lo mai thei a, mahse khawchhak lam atangin ram danga mi tur an lakna kawng a ni.
Mizoram Excise & Narcotics (MEN) department-in meth hi May thla thleng khan kg 4.056 an man a, chumi hnu chuan an man hnem hle. July thla thlengin kg 32.933 an man a, thla hnih chhungin kg 28.877 an man tihna a ni.
Tun hnai thla hnih chhungin an man hnem a, mahse kum hmasa nena khaikhinin kumina an man tawh hi a tam rih lo. Nikum khan kg 115.007 an man a, heta tanga chhut hi chuan kumin thla sarih chhunga an man hi a tam lem lo.
Meth tawlh leh hralh kawngah hian Mizoramah inhnamhnawi an tam lem lo a, Mizorama an mante pawh hi hnam dang ta tur a ni thin.
MEN department hotute sawi danin, Mizorama meth an man hi ram pawna mi tur a ni zel a, a neitute pawh hnam dang an ni deuh zel. Meth vanga Mizo an man an awm ve tho a, mahse anni pawh hi a neitu ni lovin a kengtu, a kawltu an lo ni thin.