Thla hnih chhungin mi 171 hnenah CMRF pe

Thla hnih chhungin mi 171 hnenah CMRF pe
Thla hnih chhungin mi 171 hnenah Chief Minister Relief Fund atangin cheng nuai 26 chuang semchhuah a ni.
A mamawhtute tana pekchhuah leh tura mi inphalten Chief Minister Relief Fund-a sumfai an chhunluh thinah, kumin August 22 atanga October 30 inkar khan mi mimal, eizawnna inang avanga ding leh sawrkar hnathawk intelkhawm pawl bakah tlawmngai pawl, sumdawng, political party leh bank, an vaiin mi 28 atangin CM Relief Fund-a chhunluh a ni. An sum chhunluh belhkhawm hi a vaiin Rs. 29,29, 561 a ni.
Hemi hun chhung vek hian CM Relief Fund diltu atangin mi 171 hnenah tanpuina pekchhuah a ni ve thung a. A tam ber hi damlo inenkawlna tur puihna a ni. Ruahtui tlak tam laia leimin leh khuarel chhiatna dang thleng avanga tanpuina pek bakah khawsak har tanpuina a ni hlawm.
Mi 171 hnena sumfai puihna pekchhuah zawng zawng hi Rs. 26,40, 149 a ni.
CM Relief Fund atana sum thawhtute chungah chief minister Lalduhom chuan lawmthu a sawi a. “In thilpek tlingkhawm hi a mamawh ngawih ngawihtu mi harsate hnenah pek chhuah thin a ni a, an tangkaipuiin an lawm em em thin a ni,” a ti.