Kum liam ta 2025-ah khan Mizo lehkhabu thar 223 a chhuak tiin a sawi theih a, thla tin lehkhabu thar 18 vel, chu aia tam hret a chhuak ziah ang a ni.
2025-a lehkhabu chhuak zat 223 tih hi book of the year thlang thintu Mizo Academy of Letters (MAL) chhinchhiah dan a ni a, kohhran leh pawl lehkhabu engemaw zat chhuak mah se an chhinchhiahah hian a tel lo. Mi dang nena inziah tawm ang chi a tel lo a, sorkar chhuah pawh a tel lo. Research paper leh zirlaibu a tel lo bawk a, creative writing atang chauhva book of the year an thlan avangin, a chi dang hrim hrim a tel lo. A nih chuan lehkhabu chhuak hi 400-500 vel a tling thei ang.
MAL chhinchhiahna enin, lehkhabu hi a pung a, covid vanga inkharkhip nasat kum 2020-ah 137 niin, hemi kuma a tam lo hi chu mak tih tur a ni lo ang. A kum leh 2021-ah hripui leng karah 170 a chhuak a, hripui len lai tho 2022-ah mask leh sanitizer hralh a kal em em khan 203 a tling daih. 2024-ah 170 an chhinchhiah a, chumi hnuah chuan kum thum chhung chu lehkhabu chhuak zat a pung ta.
MAL ziaktu lian Dr Zoramdinthara chuan, “Mizo lehkhabu hi a pung a, a tam telh telh. MAL hian book of the year atan hian creative writing chauh hi kan la khawm a, lehkhabu dang nena belhkhawm phei chuan thahnem tak a ni ang,” a ti.
“Hmarchhak state dangte nena khaikhin pawhin lehkhabu hi kan ngah a, mihring tam lam atanga chhutin lehkhabu chhuak zat hi a tlem lo,” a ti bawk.
Lehkhabu chhuak zat a pun thu a sawi bakah lehkhabu ngaihhlut lamah pawh thangtharteah thil lawmawm a awm thu a sawi.
“Lehkhabu hi thangtharte’n an chhuah tha khawp mai a. Mahni rilrua awm, titi nan ringawta hmang lova ziaka dah ngei an duh avangin thangtharte’n lehkhabu chhuah ve hi an duh,” a ti.
“Computer-ah laptop-ah, tablet-ah thil an ziak a, mahse a chhe thei tih an hria a. A hard copy ngeia dah an duh a,” a ti a, “Zirna nen hian thuk takin a inzawm a, mi bright kan tihte hian lehkha an chhiar a, Mizo lehkhabu leh sap tawng lehkhabu an chhiar,” a ti bawk.
Thla khatah lehkhabu thar 18 chhuah ziah ang
