Mizoram sawrkar chuan health care scheme pangngai chu thla 6 chhung hman leh rih turin a ti.
Mizoram sawrkar tharin state health care scheme thar – Universal Health Coverage Scheme a duan mek lai niin, peihfel a la nih loh avangin sawrkar kum kal mekah thla 6 chhung atan health care scheme pangngai hman a nih tur thu Mizoram State Health Care Society chuan a lo tichhuak tawh a.
Hemi hun hi a zo tawh a, health care scheme thar hi hman theih a la nih loh cheu avangin sawrkar chuan scheme hman mek hi thla 6 dang hman chhunzawm leh a nih tur thu Nilaini – October 30 khan hriattirna a tichhuak. Hei hian kumin October 1 atangin 2025 March 31 thleng a huam ang.
State sawrkar hman mek health care scheme-ah hian a inziaklutten kum khat chhungin damdawi ina an awmna cheng nuai hnih thleng medical bill an siam thei a. Sawrkar kum kal mekah thla 6 chhung hman tawhah hian cheng nuai khat thleng bill theih niin, tuna thla 6 dang pawhseiah pawh nuai khat thleng bill theih a ni. October ral dawn tawh mah se, he scheme-a inziaklut chuan October 1 hnulam ami an bill thei ang.
Inziahluhna man pawh kum chanve ang zela kalpui niin, ration card milin, AAY (card eng) nei tan Rs.100, PHH (card pawl) tan Rs.500, non-NFSA (card var) tan Rs.1000 leh ration card nei lo tan pawh Rs.1000 a ni.
Inziaklut thei chin chu – sawrkar hnathawk, sawrkara medical reimbursement bill thei emaw sawrkar hnathawkin a chenpui sawrkara MR a bill sak theihte chu Mizoram Health Care Scheme hnuaiah hian inziahluh phal a ni loa, sawrkara MR bill theilo chu he scheme hnuaiah hian an inziaklut thei. Sawrkar hnathawk 2025 March 31 hmaa pension tur tan erawh a inziahluh ve theih a ni.
Damlo, damdawi ina admit ngai, la inziaklut ve hman lo tan inziahluh hun hawn a nih chhung, 2024 November 30 thlengin damdawi in luh dawnah inziahluh theihna hmunah a tlachawpa inziahluh (spot enrolment) theih a ni a. Inziahluh theihna hmun leh a lo pawmpui theitu erawh he scheme kalpui tawh dana a ngai anga kalpui a ni.
Thla ruk chhung atan health care scheme pangngai hmang leh dawn
