Thla thum tla tur buhfai
sem har chhan sawifiah
Furpui thlirlawka sawrkar laipuiin state sawrkar-te NFSA buhfai (a thlawn chin) thla thum chhung – June atanga August pe thei tura a ruahman, Mizorama sem tlai a nih chhan chu FCS&CA department-in a sawifiah.
FCS&CA department chuan thla thum daih ration quota hi Food Corporation of India atangin a phur chhuak kim tawh a, June thla bul lam khan sem nghal mai tum a ni chungin khawl thilah rokhawlhna a awm avangin sem theih hun a tlai ta deuh a, mipui hriatthiamna an ngen tih a sawi.
A ruala thla thum quota sem hi la tih ngai loh a nih avangin FCS&CA department leh National Informatics Centre chuan AePDS software (ration semna software) her danglam dan ngaihtuahin hma lak a ni tih sawiin, ‘A tirah buhfai a thlawn chin bik chu despatch order (DO – kudam atanga retailer-te hnena buhfai pek chhuahna order) hi vawikhatah thla thum daih tur generate tum a ni. ePoS device-ah vawikhat hmehin, thla thum tana pe chhuak tura ngaih a nih laiin, thla thum DO a hlawma an siam chhinin ePoS device-a vawikhat hmehin a in issue thei lo a. A confirmation hi AePDS team, central lamin an umzui reng chungin state an rawn hriattir lo a ni,’ a ti.
DO chu thlakhat te tea siam lehin, retailer-ten an ePoS device ah an dawng a, mipuia sem chhuahna tur ber module cash PDS chu ePoS device-ah a lang leh thei ta lo tih a sawi bawk.
June 20 khan cash PDS hi a lang leh tawh a, retailer thenkhat ePoS atanga ration pek chhuah chhin tum a nih rualin, a pek tur zat (kg zat) a lang leh thei lo a, hei hi June 21 thlengin a tha loa; June 23 atangin ePos machine a hman theih a, ration la tur ten vawithum kut nem zel tur a ni tih a sawi a ni.
‘Thla thum ration NFSA quota hi dan pangngai angin a thlawn veka khul tur a ni a, mipui chu harsatna awm loa NFSA thla thum ration quota la vek tur leh retailer-te pawhin an mawhphurhna tha taka hlenchhuak theuh turin kan chah a ni,’ a ti a. Card pawl, a man nei chin (additional kg.3 @ kg ah Rs.15), card var leh card sen chu a pangngaia thla khat te tea lak tur a ni thung tih a sawi.
Thla thum tla tur buhfai sem har chhan sawifiah
