Kum 2500 vel kalta a lung lehkha a milem ziah an hai chhuah chu a zir miten an han zirchiang a, thlahrang lem ni ngeiin an hre tlat mai. British Museum-a Middle East department a senior curator Dr Irving Finkel chuan he milem hi ramhuai hnawhchhuah lam hawi niin a sawi a, “He lunglehkha a milem ziaktu hi ramhuai hnawhchhuah lama mithiam a nih ngei a rinawm a ni,” a ti.
He lunglehkha hi November ni 3, 1883 khan British Museum hian an dawng tawh a, an chhut dan chuan kum 2500 vel kalta ami kha a ni. An laihchhuahna lamah an tikeh deuh a, hei vang hian a lemziak hi a pumin hmuh theih a ni ta lo a, mahse, an hmuh theih chin an zirchianna atanga an hmuh danin ramhuai hnawhchhuah ni ngeiin an ngai a ni.
He lemziakah hian pa ria lam deuh, khabe hmul nei a banreka hruia an phuar, a hrui hmawr lehlama vuana hmeichhiain a kai lai a lang a. Babylonian thuziak a awm a, mahse, thuziak hriat theih chin chu “Shamash, lord of the broad…” tih chin chauh a hriat theih tawh a ni. Shamash hi hmanlaia Mesopotamian ni (sun) pathian a ni a, roreltu sang tak anih avangin leihnuai lam thlarau sual chenna thleng pawha thuneihna nei niin, chuvangin he pathian hi ramhuai hnawhchhuahnaah hian a lailum luahtu a ni.
Thlahrang lem hmuh theih upa ber
